ഡല്ഹി: 55 കാരിയെ മകൻ്റെ ഭാര്യയും ബന്ധുക്കളും ചേർന്ന് മർദിക്കുകയും അർദ്ധനഗ്നയായി പരേഡ് നടത്തിക്കുകയും ചെയ്തതായി പരാതി.
പഞ്ചാബിലെ തരൺ തരൺ ജില്ലയിലാണ് സംഭവം. സ്ത്രീയെ അർദ്ധ നഗ്നയാക്കി നടത്തിക്കുന്ന സംഭവത്തിൻ്റെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്. സംഭവവുമായി ബന്ധപ്പെട്ട് മൂന്ന് പേരെ അറസ്റ്റ് ചെയ്തിട്ടുണ്ട്.
തൻ്റെ മകൻ കഴിഞ്ഞ മാസം ഒരു സ്ത്രീയുമായി വിവാഹം രജിസ്റ്റർ ചെയ്തിരുന്നതായി ഇന്ത്യാ ടുഡേയോട് സംസാരിക്കവേ 55 കാരി പറഞ്ഞു. മരുമകളുടെ വീട്ടുകാർ വിവാഹത്തെ ചൊല്ലി തന്നെ മർദ്ദിക്കുകയും വസ്ത്രം വലിച്ചുകീറുകയും ചെയ്തുവെന്നും അവർ പറഞ്ഞു.
സംഭവത്തിൽ ഉൾപ്പെട്ട എല്ലാ പ്രതികളെയും പിടികൂടാൻ പോലീസ് സംഘങ്ങളെ രൂപീകരിച്ചതായി സീനിയർ പോലീസ് സൂപ്രണ്ട് അശ്വിനി കപൂർ പറഞ്ഞു.
അഞ്ച് പ്രതികളിൽ മൂന്ന് പേരെ അറസ്റ്റ് ചെയ്തിട്ടുണ്ട്, മറ്റ് രണ്ട് പേരെ കണ്ടെത്താനുള്ള ശ്രമങ്ങൾ പുരോഗമിക്കുകയാണ്. കൂടാതെ, സോഷ്യൽ മീഡിയ പ്ലാറ്റ്ഫോമുകളിൽ നിന്ന് പ്രചരിക്കുന്ന വീഡിയോ നീക്കം ചെയ്യാനുള്ള നടപടികളും സ്വീകരിച്ചുവരികയാണ്.