ഹൂസ്റ്റൺ ട്രിനിറ്റി മാർത്തോമാ ഇടവക സുവർണ്ണ ജൂബിലി ആഘോഷം: ജനുവരി 26 ന് റവ.ജോൺ ജോർജ്‌ പ്രസംഗിക്കും

ഹൂസ്റ്റൺ: ഒരു വർഷം നീണ്ടുനിൽക്കുന്ന സുവർണ ജൂബിലി ആഘോഷങ്ങളുടെ ഭാഗമായി ഹൂസ്റ്റൺ ട്രിനിറ്റി മാർത്തോമാ ഇടവകയിൽ കഴിഞ്ഞ 50 വർഷങ്ങൾ   ശുശ്രൂഷ ചെയ്ത വൈദികരെ പങ്കെടുപ്പിച്ച്‌ കൊണ്ട് നടത്തുന്ന "പിന്നിട്ട വഴികളിൽ നയിച്ചവരോടൊപ്പം" ധ്യാനയോഗ പരമ്പരയുടെ അഞ്ചാം ഭാഗം  ജനുവരി 26 നു വെള്ളിയാഴ്ച സൂം പ്ലാറ്റ് ഫോമിൽ നടത്തപ്പെടും.

വെള്ളിയാഴ്‌ച്ച  വൈകുന്നേരം 7.30 നു നടത്തപെടുന്ന ധ്യാനയോഗത്തിൽ ഇടവകയുടെ  മുൻ യൂത്ത് ചാപ്ലയിൻ റവ.ജോൺ ജോർജ്‌ അച്ചനോടൊപ്പം റീന കൊച്ചമ്മയും ദൈവവചന പ്രഘോഷണം നടത്തും. 2002 മുതൽ 2005 വരെ ട്രിനിറ്റി ഇടവക യൂത്ത് ചാപ്ലൈനായിരുന്ന അച്ചൻ ഇപ്പോൾ സെക്കന്തരാബാദ് ബെഥേൽ മാർത്തോമാ ഇടവക വികാരിയും റീന കൊച്ചമ്മ മാർത്തോമ്മ സെന്റ് തോമസ് സ്കൂൾ പ്രിൻസിപ്പാൾ കറസ്‌പോണ്ടിങ് മാനേജർ തുടങ്ങിയ നിലകളിൽ സ്തുത്യർഹ സേവനമനുഷ്ഠിക്കുന്നു. റീന കൊച്ചമ്മ മികച്ച ഒരു ഫാമിലി കൗൺസിലർ കൂടിയാണ്

ഓരോ മാസവും ക്രമീകരിച്ചിരിക്കുന്ന യോഗങ്ങൾക്കു  ഇടവകയിലെ പ്രാർത്ഥന ഗ്രൂപ്പുകൾ നേതൃത്വം നൽകി വരുന്നു. ഇടവകയിലെ യുവജനങ്ങളെ പങ്കെടുപ്പിച്ചുകൊണ്ട് നടത്തുന്ന ഈ മീറ്റിംഗിൽ യൂത്ത്  ഫെല്ലോഷിപ്പ്, യങ് ഫാമിലി ഫെലോഷിപ്പിനോടൊപ്പം മിസ്സോറി സിറ്റി സ്റ്റാഫ്‌ഫോർഡ്    പ്രാർത്ഥന ഗ്രൂപ്പും  നേതൃത്വം നൽകും. കഴിഞ്ഞ ധ്യാന യോഗങ്ങളിൽ റവ ഡോ ടി.ജെ തോമസ്, റവ.എം.ജെ തോമസ് കുട്ടി,  റവ.ടി.വി.ജോർജ്, റവ ഈപ്പൻ ചെറിയാൻ എന്നിവർ  ദൈവവചന പ്രഘോഷണം നൽകി.