പാകിസ്താൻ: പാകിസ്താനിലെ റാവൽപിണ്ടി സ്വദേശിനിയായ സീനത്ത് വാഹീദ് ഒറ്റ പ്രസവത്തിൽ ആറ് പൊന്നോമനകൾക്ക് ജന്മം നൽകി. 27 വയസുകാരിയായ ഇവർക്ക് നാല് ആൺകുട്ടികളും രണ്ട് പെൺ കുട്ടികളുമാണ് പിറന്നത്. കുട്ടികളുടെ ആരോഗ്യനില തൃപ്തികരമെന്ന് ആശുപത്രി അധികൃതർ അറിയിച്ചു.
ഹാജിറ കോളനിയിലെ താമസക്കാരിയായ യുവതിയെ പ്രസവ വേദനയെ തുടർന്ന് 18-ാം തീയതിയാണ് ജില്ലാ ആശുപത്രിയിൽ പ്രവേശിപ്പിച്ചത്. സ്പെഷ്യൽ ടീമിനെ സജ്ജമാക്കിയാണ് ശസ്ത്രക്രിയ നടത്തിയതെന്നും മൂന്നു പേരുടെ പ്രസവത്തിൽ ചില ബുദ്ധിമുട്ടുകളുണ്ടായെന്നും അതുകൊണ്ട് മൂന്ന് കുട്ടികളെ ഇൻകുബേറ്ററിലാണ് സൂക്ഷിച്ചിരിക്കുന്നതെന്ന് മെഡിക്കൽ സൂപ്രണ്ട് അറിയിച്ചു.
മാതാവിന് ചെറിയ ആരോഗ്യ പ്രശ്നങ്ങളുണ്ടെങ്കിലും വരും ദിവസങ്ങളിൽ ഇവർ സാധാരണനിലയിലാകുമെന്ന് ഡോക്ടർമാർ അറിയിച്ചു. ആശുപത്രിയിലെ ആദ്യ സംഭവമാണിതെന്നും അവർ വ്യക്തമാക്കി.