കൊച്ചി: നൈറ്റ് കഫേ അടിച്ചു തകര്ക്കുകയും ജീവനക്കാരെ ആക്രമിക്കുകയും ചെയ്ത സംഭവത്തില് യുവതി ഉള്പ്പെടെ നാലുപേര് അറസ്റ്റില്. കോട്ടയം ചങ്ങനാശേരി സ്വദേശിനി ലീന (26), ഇടുക്കി കട്ടപ്പന മേപ്പാറ ഏഴാച്ചേരില് ജെനിറ്റ് (23), വയനാട് കല്പറ്റ മുണ്ടേരി പറമ്ബില് ഹൗസില് മുഹമ്മദ് സിനാന് (22), കോട്ടയം ചങ്ങനാശേരി നാലുകോടി ഇടശ്ശേരി ഹൗസില് ആദര്ശ് ദേവസ്യ (22) എന്നിവരെയാണ് അറസ്റ്റ് ചെയ്തത്. നാലുപേരെ കൂടി പിടികൂടാനുണ്ടെന്ന് പോലീസ് വ്യക്തമാക്കുന്നു.
ബേസ് ബോള് ബാറ്റ്, ഇരുമ്പുവടി എന്നിവ ഉപയോഗിച്ചുള്ള അടിയേറ്റു കടയുടമ ഫോര്ട്ട്കൊച്ചി സ്വദേശി അമന് അഷ്കറിനും പാര്ട്ണര്ക്കും സുഹൃത്തിനും രണ്ടു ജീവനക്കാര്ക്കും പരിക്കേറ്റു. കടയിലെ സാധനസാമഗ്രികളും തല്ലിത്തകര്ത്തു. 3 ലക്ഷം രൂപയുടെ നഷ്ടമാണുണ്ടായത്. പനമ്പിള്ളിനഗര് ഷോപ്പിങ് കോംപ്ലക്സിലെ സാപിയന്സ് കഫ്റ്റീരിയയിലാണ് സംഭവം. കഫ്റ്റീരിയയില് ഭക്ഷണം കഴിക്കാനെത്തിയ ലീനയും മുന്സുഹൃത്തും തമ്മില് വാക്കുതര്ക്കവും കയ്യാങ്കളിയുമുണ്ടായിരുന്നു.
മദ്യലഹരിയിലായിരുന്ന യുവതിയെ പിന്തിരിപ്പിക്കാനുള്ള ശ്രമം സംഘര്ഷത്തില് കലാശിക്കുകയും ഇവര് എത്തിയ കാറിന്റെ ചില്ല് ഒരാള് പൊട്ടിക്കുകയും ചെയ്തു. തുടര്ന്നു ലീന പനമ്പിള്ളിനഗറില്ത്തന്നെയുണ്ടായിരുന്ന യുവാക്കളെ കൂട്ടിയെത്തി രാത്രി പത്തേകാലോടെ ആക്രമണം നടത്തുകയായിരുന്നു. അറസ്റ്റിലായ പ്രതികളെ കോടതിയില് ഹാജരാക്കി റിമാന്ഡ് ചെയ്തു.