തിരുവനന്തപുരം: കള്ളക്കടല് പ്രതിഭാസത്തെതുടര്ന്ന് തിരുവനന്തപുരത്ത് കടലാക്രമണം. ശക്തമായ തിരമാല റോഡിലേക്ക് കയറി. തിരുവനന്തപുരം അഞ്ചുതെങ്ങിന് സമീപമാണ് രൂക്ഷമായ കടലാക്രമണമുണ്ടായത്. ഇന്നലെ രാത്രിയാണ് സംഭവം.
കടലാക്രമണത്തെതുടര്ന്ന് മൂന്ന് വീടുകളിലുള്ളവരെ ഒഴിപ്പിച്ചു. ബന്ധുവീടുകളിലേക്കാണ് ഇവരെ മാറ്റിയത്. ആലപ്പുഴ തൃക്കുന്നപ്പുഴ പഞ്ചായത്ത് പത്താം വാര്ഡിലും ഇന്നലെ രാത്രി 10 മണിയോടെ നേരിയ തോതില് കടല് കയറി. മൂന്ന് കുടുംബങ്ങളെ മാറ്റിപ്പാര്പ്പിച്ചു.
കള്ളക്കടല് മുന്നറിയിപ്പിനെത്തുടര്ന്ന് കേരളാ തീരത്ത് ഓറഞ്ച് അലര്ട്ട് തുടരുകയാണ്. ഇന്ന് അര്ധരാത്രി വരെ ഉയര്ന്ന തിരമാലകള്ക്ക് സാധ്യതയുണ്ടെന്നാണ് ദേശീയ സമുദ്രസ്ഥിതി ഗവേഷണ പഠന കേന്ദ്രത്തിന്റെ മുന്നറിയിപ്പ്.
കള്ളക്കടല് പ്രതിഭാസത്തിന്റെ ഭാഗമായി കേരള തീരത്തും തെക്കന് തമിഴ്നാട് തീരത്തും ദേശീയ സമുദ്ര സ്ഥിതി പഠന ഗവേഷണ കേന്ദ്രം നേരത്തെ പ്രഖ്യാപിച്ച റെഡ് അലര്ട്ട് മുന്നറിയിപ്പ് ഇന്നലെ പിന്വലിച്ചിരുന്നെങ്കിലും ജാഗ്രതാ നിര്ദേശം തുടരുന്നുണ്ട്.