പാലാ : മാനസിക വൈകല്യമുള്ള പെൺകുട്ടിയെ പീഡിപ്പിച്ച കേസില് ഒളിവിലായിരുന്ന പ്രതി ഷാര്ജയില് പിടിയില്. തിരുവനന്തപുരം വിഴിഞ്ഞം വലിയവിളാകം വീട്ടിൽ യാഹ്യാ ഖാനാണ് (43)അറസ്റ്റിലായത്. ഷാർജയിൽ നിന്നും ഇന്റർപോളിന്റെ സഹായത്തോടെയാണ് അറസ്റ്റ് ചെയ്തത്.
പാത്രക്കച്ചവടത്തിനായി ഇയാൾ പാലായിലെ ഒരു വീട്ടിൽ എത്തുകയും, വീട്ടിൽ തനിച്ചായിരുന്ന മാനസിക വൈകല്യമുള്ള പെൺകുട്ടിയെ പീഡിപ്പിക്കുകയുമായിരുന്നു. 2008ലാണ് സംഭവം നടന്നത്. സംഭവം നടന്ന് ഏറെ വൈകാതെ തന്നെ പ്രതിയെ പൊലീസ് അറസ്റ്റ് ചെയ്യുകയും ചെയ്തു. പിന്നീട് ജാമ്യത്തിൽ ഇറങ്ങിയ ഇയാൾ ഒളിവിൽ പോവുകയായിരുന്നു.
കേസിന്റെ വിചാരണ തുടങ്ങാന് നിശ്ചയിച്ച 2012ലാണ് ഇയാള് മുങ്ങിയ കാര്യം പൊലീസ് അറിഞ്ഞത്. പ്രതിയെ പിടികൂടുന്നതിനുവേണ്ടി എസ്.പിയുടെ നേതൃത്വത്തിൽ പ്രത്യേക അന്വേഷണസംഘം രൂപവത്കരിച്ചിരുന്നു.
കണ്ണൂർ, മലപ്പുറം എന്നീ ഭാഗങ്ങളിൽ ഒളിവിൽ കഴിഞ്ഞതിനുശേഷം ഇയാള് വിദേശത്തേക്ക് കടന്നതായി പൊലീസ് അന്വേഷണത്തില് കണ്ടെത്തി. ഒളിവില് കഴിയുന്നതിനിടെ രണ്ടു പെണ്കുട്ടികളെ പ്രതി വിവാഹം കഴിച്ചിരുന്നതായും അന്വേഷണത്തില് വ്യക്തമായി. പൊലീസ് റിപ്പോര്ട്ടിന്റെ അടിസ്ഥാനത്തില് 2024 ജനുവരിയിൽ ഇയാളെ അന്താരാഷ്ട്ര കുറ്റവാളിയായി പ്രഖ്യാപിച്ചു
ഇതിനു പിന്നാലെയാണ് ഷാര്ജയില് ഇയാള് കഴിയുന്നുണ്ടെന്ന വിവരം ലഭിച്ചത്. ഇന്ര്പോള് ഷാര്ജയില് തടഞ്ഞുവച്ച പ്രതിയെ പാലാ ഡിവൈഎസ്പി കെ.സദന്, പ്രിന്സിപ്പല് എസ്ഐ വി.എല്.ബിനു എന്നിവരടങ്ങുന്ന സംഘം ഷാര്ജയിലെത്തി കസ്റ്റഡിയില് എടുക്കുകയായിരുന്നു. ഇയാളെ വിമാന മാർഗം ശനിയാഴ്ച ഉച്ചയ്ക്ക് 12 മണിയോടുകൂടി കൊച്ചിയിൽ എത്തിച്ചു.