'അയാൾ എന്റെ കാൽ തല്ലിയൊടിച്ചു; മരിക്കാനായി കൈ മുറിച്ചതിന് ഏഴ് സ്റ്റിച്ചോളം ഇട്ടു': ബഷീര്‍ ബഷിക്കെതിരെ വെളിപ്പെടുത്തലുമായി ശ്രിയ അയ്യർ

മലയാളികള്‍ക്ക് സുപരിചിതയാണ് അവതാരകയും ബോഡി ബില്‍ഡറുമായ ശ്രിയ അയ്യര്‍ . തനിക്ക് ജീവിതത്തില്‍ നേരിടേണ്ടി വന്ന ദുരനുഭവത്തെ കുറിച്ച് ശ്രിയ പറഞ്ഞ വാക്കുകളാണ് ശ്രദ്ധ നേടുന്നത്. മുന്‍പ് ബഷീര്‍ ബഷി എന്ന വ്യക്തിയുമായി റിലേഷന്‍ ഉണ്ടായിരുന്ന സമയത്ത് അയാള്‍ തന്നെ ശാരീരികമായി ഉപദ്രവിക്കുമായിരുന്നു എന്ന് പറയുകയാണ് ശ്രിയ. അയാള്‍ തന്റെ കാല്‍ തല്ലിയൊടിച്ചിട്ടുണ്ടെന്നും, ഒന്നിനും സ്വാതന്ത്ര്യമില്ലാത്ത അവസ്ഥയായിരുന്നു അന്നെന്നും ശ്രിയ പറയുന്നു.

ശ്രിയയുടെ വാക്കുകള്‍ ഇങ്ങനെയാണ്... ''ആത്മഹത്യ ചെയ്യാന്‍ അന്ന് തീരുമാനിച്ചത് ശരിയാണെന്ന് തന്നെ പറയാം. കാരണം അന്നത്തെ സഹാചര്യം അതായിരുന്നു. ഇന്നാണെങ്കില്‍ ഞാനത് ചെയ്യില്ല. ആ സിറ്റുവേഷന്‍ ഓര്‍മ്മിക്കുമ്പോള്‍ ഇന്നും സങ്കടം വരും. അന്ന് അച്ഛനെയും അമ്മയെയും കുറിച്ചോന്നും ഓര്‍മ്മ വന്നില്ല. എന്നാല്‍ ആത്മഹത്യയ്ക്ക് ശ്രമിച്ചതിന് ശേഷമാണ് എന്ത് വന്നാലും കൂടെയുണ്ടാവുമെന്ന പിന്തുണയുമായി അമ്മ വന്നത്. ഒരു തവണ മരിക്കാനായി കൈ മുറിച്ചതിന് ഏഴ് സ്റ്റിച്ചോളം ഇട്ടിട്ടുണ്ടായിരുന്നു. ആ പാട് മറക്കാന്‍ വേണ്ടിയാണ് അവിടെ ടാറ്റു അടിച്ചിരിക്കുന്നത്. അന്നുണ്ടായിരുന്ന റിലേഷന്‍ കാരണം അമ്മയ്ക്ക് എന്നോട് ദേഷ്യമായിരുന്നു. ആരും കൂടെയില്ലാത്തൊരു സാഹചര്യമാണല്ലോ എന്ന് തോന്നിയപ്പോഴാണ് അങ്ങനെ ചെയ്തത്. 

പിന്നെ അമ്മ തന്ന മോട്ടിവേഷനാണ് എന്റെ തലവര മാറ്റിയത്. എനിക്ക് വേണ്ടി അച്ഛനും അമ്മയുമുണ്ടെന്ന തോന്നല്‍ വന്നപ്പോള്‍ അവര്‍ക്ക് വേണ്ടി ജീവിക്കാന്‍ തോന്നി. ഞാന്‍ കാര്‍ വാങ്ങിയപ്പോഴൊക്കെ അച്ഛന് വലിയ സന്തോഷമായി. അവരെയും കൂട്ടി പോയാണ് വാങ്ങിയത്. എന്നാല്‍ ഒരു വര്‍ഷം മുന്‍പ് എനിക്ക് അച്ഛനെ നഷ്ടമായി. കാശിയില്‍ പോയി തിരികെ നാട്ടിലേക്ക് വരുന്നതിനിടെ ട്രെയിനില്‍ വച്ചായിരുന്നു അച്ഛന്റെ മരണം. മാത്രമല്ല എന്റെ വിവാഹം അദ്ദേഹം കാണുകയും ഞങ്ങളെ അനുഗ്രഹിക്കുകയുമൊക്കെ ചെയ്തിട്ടാണ് പോയത്.

അന്നത്തെ ആ റിലേഷനില്‍ അദ്ദേഹം എന്നെ ഒരുപാട് ഉപദ്രവിച്ചിരുന്നു. എന്റെ കാല്‍ തല്ലിയൊടിക്കുക വരെ ചെയ്തു. മാത്രമല്ല ഒന്നിനും സ്വതന്ത്ര്യമില്ലാത്ത അവസ്ഥയായിരുന്നു. എന്റെ ഫോണിലേക്ക് കോള്‍ വരുന്നത് പോലും നോക്കും. എന്നെ ആരൊക്കെ വിളിച്ചു, എന്തൊക്കെ സംസാരിച്ചു, എന്നൊക്കെ അയാള്‍ പരിശോധിക്കുമായിരുന്നു. പക്ഷേ ഇപ്പോഴത്തെ ഭര്‍ത്താവ് പാവമാണ്. എന്റെ ഫോണ്‍ പോലും തുറന്ന് നോക്കില്ല.'' സൈന സൗത്ത് പ്ലസിന് നല്‍കിയ അഭിമുഖത്തില്‍ ശ്രിയ പറയുന്നു.