ചേർത്തുനിർത്തണമെന്ന്
നീ മോഹിക്കുന്നതുകൊണ്ടാണ്
വിരിഞ്ഞ നെഞ്ച് എനിക്ക്
പ്രൗഢിയായത്
കരുതൽ നീ കൊതിക്കുന്നതുകൊണ്ടാണ്
ഞാൻ നാഥനായത്
നീ വിചാരിക്കുന്നതുകൊണ്ടാണ്
ഞാൻ രാത്രിയെ ഭയക്കാത്തത്
നിന്റെ കല്പനകളിലാണ്
ഞാൻ ധൈര്യശാലിയായത്
നീ പ്രതീക്ഷിക്കുന്നതുകൊണ്ടാണ്
ഞാൻ തീരുമാനങ്ങളെടുക്കുന്നത്
നിന്റെ സങ്കല്പനങ്ങളിൽ മാത്രമാണ്
ഞാൻ രൂപപ്പെടുന്നത്
നിന്റെ ചാരുതകൾ മറിച്ചായിരുന്നെങ്കിൽ
ഞാൻ പേടിച്ച് മരിച്ചുപോയേനെ
പ്രതിഷ്ഠിക്കാതെനോക്കൂ
അപ്പോൾ തീരുന്നതേയുള്ളൂ
എന്റെ പകിടകളികൾ
സുധി കോട്ടൂർ