ടോണ്ടൻ മലയാളി അസോസിയേഷൻ ക്രിസ്തുമസ് - ന്യൂ ഇയർ ആഘോഷം പ്രൗഢ ഗംഭീരമായി; ആവേശ തിരയിളക്കം സമ്മാനിച്ച് മ്യൂസിക് - ഡാൻസ് ഷോയും ഡിജെയും

ടോണ്ടൻ: ടോണ്ടൻ കേന്ദ്രീകരിച്ച് താമസിക്കുന്ന മലയാളികളുടെ കൂട്ടായ്മയായ ടോണ്ടൻ മലയാളി അസോസിയേഷൻ സംഘടിപ്പിച്ച ക്രിസ്തുമസ് - നവവത്സര ആഘോഷം വർണ്ണാഭമായി. 

തിരുപ്പിറവി - പുതുവർഷ ആഘോഷത്തിനു വേദിയൊരുങ്ങിയ ടോണ്ടൻ ട്രോക്കോപ്പ് ടാബ്ള ഹാളിൽ വൈസ് പ്രസിഡണ്ട് ജിജി ജോർജ്ജ് ഏവർക്കും ഹൃദ്യമായ സ്വാഗതം ആശംസിച്ചു.

ഉദ്ഘാടന ചടങ്ങിൽ ടിഎംഎ പ്രസിഡണ്ട് ജിതേഷ് പണിക്കർ അദ്ധ്യക്ഷത വഹിച്ചു. ടോണ്ടൻ ടൗൺ കൗൺസിൽ മേയർ നിക്ക് ഓ ഡോന്നേൽ മുഖ്യാതിഥിയായി പങ്കു ചേർന്ന് സംസാരിച്ചു. സെന്റ് മേരീസ് പള്ളി വികാരി ഫാ. രാജേഷ് എബ്രഹാം ആഘോഷത്തിൽ പങ്കുചേരുകയും ക്രിസ്തുമസ്സ് സന്ദേശം നൽകുകയും ചെയ്തു.

ടിഎംഎയുടെ ചെറിയ കുട്ടികൾ മുതൽ മുതിർന്നവർ വരെ അണിനിരന്ന കലാസന്ധ്യ വേദിയിൽ ആവേശത്തിരയിളക്കിയ ദൃശ്യ - ശ്രവണ - നൃത്ത  വിരുന്നാണ് സമ്മാനിച്ചത്. ലണ്ടനിൽ നിന്നുള്ള പ്രമുഖ ഡാൻസ് ട്രൂപ്പ് 'ഏഞ്ചൽസ്'  അവതരിപ്പിച്ച നൃത്തോത്സവം ആഘോഷത്തിന് കൊഴുപ്പേകി. 

ഇൻസ്ട്രമെന്റ് മ്യൂസിക്കിൽ വയലിൻ ഉപയോഗിച്ച് നടത്തിയ സംഗീതവും ഏറെ ആകർഷകമായി. തുടർന്ന് നടന്ന സംഗീത മാസ്മരികലോകം വേദിക്കു സമ്മാനിച്ച സംഗീത സന്ധ്യ ആഘോഷത്തിലെ ഹൈലൈറ്റായി.

ആഘോഷ രാവിനെ കോരിത്തരിപ്പിച്ച ഡിജെ, സദസ്സിനെ ഒന്നാകെ നൃത്തസാന്ദ്രതയിൽ ആറാടിച്ചു. വിഭവ സമൃദ്ധമായ ന്യൂ ഇയർ ഗ്രാൻഡ് ഡിന്നർ ഏറെ ആസ്വാദകരമായി.

ടോണ്ടൻ മലയാളികൾക്ക് മണിക്കൂറുകളോളം ആവേശവും ആഹ്‌ളാദവും പകർന്ന അവിസ്മരണീയമായ ആഘോഷോത്സവത്തിനു വിനു വിശ്വനാഥൻ നായർ (സെക്രട്ടറി), ബിജു ഇളംതുരുത്തിൽ (ജോയിന്റ് സെക്രട്ടറി), അരുൺ ധനപാലൻ (ട്രഷറർ), കമ്മറ്റി മെമ്പർമാരായ ഡെന്നിസ് വി ജോസ്, ജയേഷ് നെല്ലൂർ, അജി തോമസ് മാങ്ങാലി, ദീപക്  കുമാർ, സജിൻ ജോർജ് തോമസ് എന്നിവർ നേതൃത്വം വഹിച്ചു. നന്ദി പ്രകാശനത്തോടെ ആഘോഷത്തിന് സമാപനമായി.