ദളപതി 67ൽ വിജയ്‌ക്കൊപ്പം ഫഹദ് ഫാസിലും, ആരാധകരുടെ കാത്തിരിപ്പ് കൂടി

വിജയ് ആരാധകര്‍ ഏറെ ആകാംക്ഷയോടെ കാത്തിരിക്കുന്ന പ്രോജക്ട് ആണ് ദളപതി 67. മാസ്റ്ററിനു ശേഷം ലോകേഷ് കനകരാജ്–വിജയ് ഒന്നിക്കുന്ന ചിത്രം എന്ന നിലയിൽ ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്. കമല്‍ ഹാസന്‍ ചിത്രം’വിക്രമി’ന്റെ ഭാഗമായിരുന്ന ഫഹദ് ഫാസിലും ദളപതി 67-ല്‍ എത്തും. ഭാവന സ്റ്റുഡിയോസ് നിര്‍മ്മിക്കുന്ന തങ്കം സിനിമയുടെ മാധ്യമ മീറ്റിലാണ് നടന്‍ ഇക്കാര്യം സ്ഥിരീകരിച്ചത്. നടന്‍ അതിഥി വേഷത്തിലായിരിക്കുമെന്നും റിപ്പോര്‍ട്ടുണ്ട്.

കന്നഡ താരം രക്ഷിത് ഷെട്ടിയും സിനിമയുടെ ഭാഗമാകുമെന്ന റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ ഇക്കാര്യത്തില്‍ സ്ഥിരീകരണം ഉണ്ടായിട്ടില്ല. സഞ്ജയ് ദത്ത്, നിവിന്‍ പോളി, വിശാല്‍ തുടങ്ങിവയവരുടെ പേരുകളും സിനിമയുമായി ബന്ധപ്പെട്ട് കേള്‍ക്കുന്നുണ്ട്. ‘മാസ്റ്ററി’ന് ശേഷം ലോകേഷുമായി ഒന്നിക്കുന്ന ചിത്രത്തില്‍ നാല്പതുകളില്‍ എത്തിയ ഒരു ഗ്യാങ്സ്റ്ററായാണ് വിജയ് അഭിനയിക്കുന്നത്. വിജയ് ചിത്രത്തില്‍ സാള്‍ട്ട് ആന്‍ഡ് പെപ്പര്‍ ഗെറ്റപ്പിലാകുമെത്തുക എന്നും സൂചനകളുണ്ട്. ഹോളിവുഡ് ചിത്രം ‘ഹിസ്റ്ററി ഓഫ് വയലന്‍സി’ന്റെ റീമേക്കായിരിക്കും സിനിമ എന്നും അഭ്യൂഹങ്ങളുണ്ട്. വിജയ് എന്ന സൂപ്പർതാരത്തിന്റെ ആരാധകരെ തൃപ്തിപ്പെടുത്തുന്നതിനായി ചില കൈകടത്തലുകൾ മാസ്റ്ററിൽ കൊണ്ടുവന്നിരുന്നുവെന്ന് ലോകേഷ് പറഞ്ഞിരുന്നു.

മാസ്റ്റര്‍, വിജയ്‍യുടേയും തന്റേയും 50-50 ശതമാനം സിനിമ ആണെന്നായിരുന്നു ലോകേഷ് കനകരാജ് അന്ന് പറഞ്ഞിരുന്നത്. എന്നാല്‍ ദളപതി 67 നൂറ് ശതമാനവും തന്റെ ചിത്രമായിരിക്കുമെന്ന് വ്യക്തമാക്കുകയാണ് ലോകേഷ്.  തൃഷയായിരിക്കും സിനിമയിലെ നായിക. 14 വര്‍ഷങ്ങള്‍ക്ക് ശേഷമാണ് തൃഷ – വിജയ് കോംബോ സ്‌ക്രീനില്‍ എത്തുന്നത്. സംഗീതം ഒരുക്കുന്നത് അനിരുദ്ധ് രവിചന്ദര്‍ ആണ്. ചിത്രം ലോകേഷിന്റെ ‘എല്‍സിയു’വിന്റെ ഭാഗമാണെന്നും അഭ്യൂഹങ്ങളുണ്ട്.