200 കിമീ മൈലേജ്, വെറും 2000 രൂപയ്ക്ക് ബുക്ക് ചെയ്യാം ഈ കുഞ്ഞന്‍ കാര്‍

ഇലക്‌ട്രിക് വാഹനങ്ങൾ ഇക്കാലത്ത് വളരെയധികം പ്രചാരം നേടുകയാണ്. എങ്കിലും ഇപ്പോൾ വിപണിയില്‍ ലഭിക്കുന്ന ഏറ്റവും താങ്ങാനാവുന്ന പാസഞ്ചർ ഇവി ടാറ്റ ടിഗോർ ഇവിയാണ്. ഇതിന് 10 ലക്ഷം രൂപയില്‍ അധികം വിലവരും. എന്നാല്‍ മുംബൈ ആസ്ഥാനമായുള്ള പിഎംവി ഇലക്ട്രിക് എന്ന ഇലക്ട്രിക് വാഹന സ്റ്റാർട്ടപ്പ് 10 ലക്ഷത്തിൽ താഴെ വിലയില്‍ നഗര വൈദ്യുത യാത്രകള്‍ക്കായി ഒരു മൈക്രോ ഇലക്ട്രിക് കാർ അവതരിപ്പിക്കാൻ പോകുകയാണ്. ഈസ്-ഇ എന്ന പേരിൽ രണ്ട് സീറ്റുള്ള ഇലക്ട്രിക് വാഹനം കമ്പനി 2022 ജൂലൈയിൽ 4 ലക്ഷം രൂപ (എക്സ്-ഷോറൂം) പ്രാരംഭ വിലയിൽ പുറത്തിറക്കും എന്ന് എക്‌സ്‌പ്രസ് ഡ്രൈവ്‌സിനെ ഉദ്ദരിച്ച് കാര്‍ ടോഖ് റിപ്പോര്‍ട്ട് ചെയ്യുന്നു.

2,000 രൂപയ്ക്ക് റീഫണ്ട് ചെയ്യാവുന്ന തുകയ്‌ക്ക് ഈസ് - ഇയ്‌ക്കായി പി‌എം‌വി ഇലക്ട്രിക് ഓൺലൈൻ ബുക്കിംഗ് സ്വീകരിച്ചു തുടങ്ങി എന്നും ഇലക്ട്രിക് കാറിന്റെ ലോഞ്ചിംഗും ഡെലിവറിയും 2023 രണ്ടാം പാദത്തിന്റെ അവസാനത്തിൽ നടക്കുമെന്നും പ്രതീക്ഷിക്കുന്നതായാണ് റിപ്പോര്‍ട്ടുകള്‍. 13 ഇഞ്ച് അലോയ് വീലുകളിൽ പ്രവർത്തിക്കുന്ന രണ്ട് സീറ്റുകളുള്ള പിഎംവി ഈസ്-ഇക്ക് മുന്നിൽ ഒരു സീറ്റും പിന്നിൽ ഒരു സീറ്റും ഉണ്ട്, നാല് ഡോർ ഡിസൈൻ ലഭിക്കുന്നു.

കാറിന് ലംബമായി വിന്യസിച്ച പിൻ വിൻഡ്‌സ്‌ക്രീനും താഴത്തെ പകുതിയിൽ ചരിഞ്ഞ ഗ്ലോസ് ബ്ലാക്ക് പാനലും വീതിയിൽ നീട്ടിയിരിക്കുന്ന LED ടെയിൽ ലാമ്പുകളും ലഭിക്കുന്നു. ഫുൾ-ടിഎഫ്‌ടി ഡിജിറ്റൽ ഇൻസ്ട്രുമെന്റ് കൺസോൾ, ഫ്രീ മൗണ്ടഡ് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, റിമോട്ട് കീലെസ് എൻട്രി, യുഎസ്ബി ചാർജിംഗ് പോർട്ട്, മാനുവൽ എസി, ക്രൂയിസ് കൺട്രോൾ, റിയർ പാർക്കിംഗ് ക്യാമറ, സെൻസറുകൾ തുടങ്ങിയ ആധുനിക ഫീച്ചറുകളും കാറിനുണ്ട്.

പുതിയ പിഎംവി ഈസ്-ഇക്ക് കരുത്ത് പകരുന്നത് മുൻവശത്ത് ഘടിപ്പിച്ച 15 kW (20 bhp) ഇലക്ട്രിക് മോട്ടോറായിരിക്കും. ഈ കാറിന് മണിക്കൂറിൽ 70 കിലോമീറ്റർ വേഗത കൈവരിക്കാൻ കഴിയും. കാറിന് 10 kWh ലിഥിയം അയേൺ ഫോസ്ഫേറ്റ് ബാറ്ററി ഉണ്ടായിരിക്കും. തിരഞ്ഞെടുക്കുന്ന വേരിയന്റിനെ ആശ്രയിച്ച് ഒരു ചാർജിന് 120 കിലോമീറ്റർ മുതൽ 200 കിലോമീറ്റർ വരെ റേഞ്ച് നൽകുമെന്ന് പ്രതീക്ഷിക്കുന്നു. 3 kW എസി ചാർജർ ഉപയോഗിച്ച്, Eas-E യുടെ ബാറ്ററി നാല് മണിക്കൂറിൽ താഴെ ചാർജ് ചെയ്യാം.

2,915 എംഎം നീളവും 1,157 എംഎം വീതിയും 1,600 എംഎം ഉയരവുമുള്ള പുതിയ പിഎംവി ഈസ്-ഇക്ക് 170 എംഎം ഗ്രൗണ്ട് ക്ലിയറൻസും 2087 എംഎം വീൽബേസും 550 കിലോഗ്രാം ഭാരവുമുണ്ട്. Ola S1 Pro പോലെ, PMV Eas-E ഉപഭോക്താക്കൾക്ക് D2C (ഉപഭോക്താവിലേക്ക് നേരിട്ട്) മോഡ് വഴി വിൽക്കും, അങ്ങനെ ഡീലർ ഔട്ട്‌ലെറ്റുകൾ വഴിയുള്ള വിൽപനയുടെ പരമ്പരാഗത പ്രക്രിയ ഇല്ലാതാക്കുന്നു. ചക്കനിലെ നിർമ്മാണ യൂണിറ്റിൽ നിന്ന് ഉൽപ്പാദനത്തിന്റെ ആദ്യ വർഷത്തിൽ 15,000 യൂണിറ്റ് ഈസ്-ഇ ഉത്പാദിപ്പിക്കാനാണ് പിഎംവി ലക്ഷ്യമിടുന്നത്.