പ്രവാസിയായ ജെയിൻ ജോർജ് നിർമ്മിച്ച്, ഷഫീഖ് ആയൂർ സംവിധാനം ചെയ്ത "TAMARISK"(പിചുല വൃക്ഷം ) ഹ്രസ്വ ചിത്രം ഷാർജയിൽ റിലീസ് ചെയ്തു

പ്രവാസിയായ ജെയിൻ ജോർജ് നിർമ്മിച്ച്, ഷഫീഖ് ആയൂർ സംവിധാനം ചെയ്ത "TAMARISK"(പിചുല വൃക്ഷം )എന്ന ഹ്രസ്വ ചിത്രം ഷാർജയിൽ റിലീസ് ചെയ്തു.

ജെയിൻ ജോർജ് മുഖ്യ കഥാപാത്രത്തെ അവതരിപ്പിച്ച സിനിമയുടെ പ്രദർശന വേളയിൽ യുഎഇ യുടെ സാമൂഹിക -സാംസ്കാരിക -വിദ്യാഭ്യാസമേഖലയിലെ പ്രമുഖരായ ഡോ.ഇ.പി ജോൺസൺ, (പ്രസിഡന്റ്‌ -ഷാർജ ഇന്ത്യൻ അസോസിയേഷൻ ), രമേശ്‌ പയ്യന്നൂർ (ഡയറക്ടർ റേഡിയോ ഏഷ്യ ) അൻസാർ കൊയിലാണ്ടി (സാമൂഹ്യ പ്രവർത്തകൻ ), സാദിഖ് കാവിൽ (മാധ്യമപ്രവർത്തകൻ ), ഷാജി പുഷ്പാംഗദൻ (എഴുത്തുകാരൻ, ഡയറക്ടർ ), സിറാജ് നായർ (സിനിമ ) തുടങ്ങിയവർ പങ്കെടുത്തു.

അഭിനയമികവിലും, സംവിധാനത്തിലും, സംഗീതത്തിലും ഉയർന്ന നിലവാരം പുലർത്തിയ ഈ ചിത്രം കാണികളുടെ കണ്ണുകളെ ഈറനണിയിച്ചു. പ്രേക്ഷകർക്കു തീർച്ചയായും ഒരു ദൃശ്യ വിരുന്നുതന്നെയാണ് ഈ ചിത്രം.

പ്രവാസികളുടെ നൊമ്പരങ്ങളുടെയും, സഹനത്തിന്റെയും, ത്യാഗത്തിന്റെയും കഥ പറയുന്ന" TAMARISK", പേര് പോലെ തന്നെ മണലാരണ്യത്തിൽ ഒറ്റപ്പെട്ടുപോയ ഒരു മനുഷ്യന്റെ കഥ ആണ്. മരുഭൂമിയിൽ മനുഷ്യരെ കാണാൻ കഴിയാതെ ഏകനായി , നീറി നീറി ജീവിതം ഹോമിക്കപ്പെടുന്ന പ്രവാസികളുടെ കഥയാണ് ഈ ചിത്രം പറയുന്നത്.

കാഴ്ചക്കാരുടെ ഉള്ളിൽ ഇത് ഞാൻ തന്നെയല്ലേ എന്ന് തോന്നിപ്പിക്കുന്ന, തന്മയീ ഭാവം ഉടലെടുക്കാൻ ഈ ചിത്രം സാധ്യമാക്കി തരുന്നു എന്നുള്ളത് തന്നെയാണ് ഇതിന്റെ വിജയവും. തികച്ചും കലാമൂല്യമുള്ള ഈ ചിത്രത്തിന്റെ അണിയറ പ്രവർത്തകർ എല്ലാം തന്നെ പ്രവാസികൾ ആണെന്നുള്ള ഒരു പ്രത്യേകതയും കൂടി ഇതിനുണ്ട്.

സ്ത്രീ ശബ്ദത്തിലൂടെ ആ കഥാപാത്രത്തിന്റെ യഥാർത്ഥ രൂപം കാണികളുടെ മനസ്സിലേക്ക് കോറിയിടാൻ സംവിധായകന് കഴിയുന്നുമുണ്ട്. ചിത്രത്തിന്റെ എല്ലാവശങ്ങളും നോക്കി കണ്ട് ഒരു തരത്തിലുമുള്ള പോരായ്മകൾ വരാതെ സസൂക്ഷ്മം സംവിധാനം ചെയ്ത ഷഫീഖ് നല്ലൊരു സംവിധായകൻ തന്നെ എന്ന് തെളിയിച്ചിരിക്കുകയാണ് ഈ ചിത്രത്തിലൂടെ. കൈയൊതുക്കത്തിലൂടെ കഴിവ് തെളിയിച്ച ഷഫിഖ്, ഭാവി തലമുറയുടെ വാഗ്ദാനം തന്നെയാണ്.