'കുട്ടിക്കാലത്ത് എനിക്കൊരു പെണ്‍കുട്ടിയോട് ഇഷ്ടമുണ്ടായിരുന്നു പക്ഷേ ഞാനത് തുറന്നു പറഞ്ഞില്ല. തുറന്നു പറഞ്ഞിരുന്നെങ്കില്‍ ഒരുപക്ഷേ അവളുടെ പട്ടി എന്നെ കടിച്ചേനെ'; ആദ്യ 'ക്രഷി'നെ കുറിച്ച് സല്‍മാന്‍ ഖാന്‍

ബോളിവുഡ് താരങ്ങളുടെ വിശേഷങ്ങൾ അറിയാൻ ആരാധകർക്ക് വല്ലാത്ത താൽപര്യമാണ്. താരങ്ങളുടെ ചെറിയ വിശേഷങ്ങൾ പോലും സോഷ്യൽ മീഡിയയിൽ വലിയ വാർത്തയാവാറുണ്ട്. അതിൽ പ്രധാനിയാണ് സൽമാൻ ഖാൻ. താരത്തിന്റെ പ്രണയബന്ധങ്ങൾ എന്നും ബോളിവുഡിലെ ചൂടേറിയ ചർച്ചകളായിരുന്നു.

ഐശ്വര്യ റായി മുതൽ നിരവധി നടിമാരുമായി സൽമാൻ ഖാന്റെ പേര് പല കാലങ്ങളിൽ ഉയർന്നുവന്നിരുന്നു. എന്നാൽ ഈ ബന്ധങ്ങൾക്ക് അധിക നാളത്തെ ആയുസ്സ് ഉണ്ടായിരുന്നില്ല. ഇപ്പോഴിതാ തന്റെ ആദ്യത്തെ ക്രഷിനെ കുറിച്ച് മനസ്സ് തുറക്കുകയാണ് താരം.

തന്റെ കുട്ടിക്കാലത്തെ 'ക്രഷ്' ഇപ്പോള്‍ മുത്തശ്ശിയാണെന്നാണ് സല്‍മാന്‍ പറയുന്നത്. താരം അവതാരകനായ ബിഗ്‌ബോസിലായിരുന്നു താരത്തിന്റെ വെളിപ്പെടുത്തല്‍. കുട്ടിക്കാലത്ത് എനിക്കൊരു പെണ്‍കുട്ടിയോട് ഇഷ്ടമുണ്ടായിരുന്നു പക്ഷേ ഞാനത് തുറന്നു പറഞ്ഞില്ല. തുറന്നു പറഞ്ഞിരുന്നെങ്കില്‍ ഒരുപക്ഷേ അവളുടെ പട്ടി എന്നെ കടിച്ചേനെ സല്‍മാന്‍ പറഞ്ഞു.

കുട്ടിക്കാലത്ത് ഒരേ സമയം തനിക്കും തന്റെ മൂന്ന് സുഹൃത്തുക്കള്‍ക്കും ഒരു പെണ്‍കട്ടിയെ ഇഷ്ടമായിരുന്നു. അവള്‍ അവഗണിക്കുമോ എന്ന ഭയം കാരണം അത് അവളോട് പറഞ്ഞില്ല. എന്നാല്‍ പിന്നീടാണ് അവള്‍ക്കും തന്നെ ഇഷ്ടമാണെന്ന് മനസിലാക്കിയതെന്ന് സല്‍മാന്‍ പറഞ്ഞു.

15 വര്‍ഷങ്ങള്‍ക്ക് ശേഷം അവളെ കണ്ടു. അന്ന് അത് പറയാതിരുന്നതിന് ദൈവത്തിന് നന്ദി. അവളെക്കുറിച്ച് എന്റെ മനസിലുണ്ടായിരുന്ന ചിത്രം മാറി. അവള്‍ ഇപ്പോള്‍ ഒരു മുത്തശ്ശിയാണ്. ചെറുമക്കള്‍ എന്റെ ഫാന്‍ ആണെന്ന് അവള്‍ പറഞ്ഞു. ഞാന്‍ വിവാഹം കഴിച്ചിരുന്നെങ്കില്‍ ഞാനും ഒരു മുത്തച്ഛന്‍ ആകുമായിരുന്നുവെന്നും സല്‍മാന്‍ പറഞ്ഞു.