കുവൈറ്റ് സിറ്റി: കുവൈറ്റില് കോവിഡ് മഹാമാരിയെ നേരിടാനുള്ള സർക്കാരിന്റെ ശ്രമങ്ങളെ പിന്തുണയ്ക്കുന്നതിനായി സജീവമായി പണം സ്വീകരിച്ചിരുന്ന എല്ലാ പ്രാദേശിക ബാങ്കുകളുടെയും അക്കൗണ്ടുകൾ അടച്ചുപൂട്ടണമെന്ന് മന്ത്രിസഭ നിര്ദ്ദേശിച്ചു.
ധനകാര്യ മന്ത്രി അബ്ദുൽ വഹാബ് അൽ റഷീദ് പുറപ്പെടുവിച്ച നിർദ്ദേശങ്ങൾ അനുസരിച്ച്, ഇതുമായി ബന്ധപ്പെട്ട സംഭാവനകൾ സ്വീകരിക്കുന്നതിന് സെൻട്രൽ ബാങ്ക് ഓഫ് കുവൈറ്റിൽ തുറന്നിരിക്കുന്ന പ്രധാന അക്കൗണ്ട് മാത്രമേ നിലനിർത്തൂ. പ്രാദേശിക ബാങ്കുകളിലെ സംഭാവനകൾ ഗണ്യമായി കുറഞ്ഞതാണ് പ്രാദേശിക ബാങ്കുകളിലെ അക്കൗണ്ടുകൾ അവസാനിപ്പിക്കാൻ കാരണമെന്നും അദ്ദേഹം കൂട്ടിച്ചേർത്തു.
2020 മാർച്ച് 26 ന് നടന്ന അസാധാരണ യോഗത്തിൽ, കോവിഡ് -19 നെ നേരിടാനുള്ള ശ്രമങ്ങളെ പിന്തുണയ്ക്കുന്നതിനായി പണ സംഭാവന സ്വീകരിക്കുന്നതിന് എല്ലാ പ്രാദേശിക ബാങ്കുകളിലും ഇടനില അക്കൗണ്ടുകൾ തുറക്കുന്നതിന് മന്ത്രിമാരുടെ കൗൺസിൽ അംഗീകാരം നൽകിയിരുന്നു.