കുവൈറ്റില്‍ ശമ്പളം നൽകാതെ പ്രയാസപ്പെടുത്തുന്ന കമ്പനികളിൽനിന്നും സ്ഥാപനങ്ങളിൽനിന്നും തങ്ങളുടെ വർക്ക് പെർമിറ്റുകൾ മറ്റ് സ്വകാര്യ സ്ഥാപനങ്ങളിലേക്ക് മാറ്റാൻ തൊഴിലാളികളെ അനുവദിക്കുമെന്ന് അധികൃതർ

കുവൈത്ത് : കുവൈറ്റില്‍ ശമ്പളം നൽകാതെ പ്രയാസപ്പെടുത്തുന്ന കമ്പനികളിൽനിന്നും സ്ഥാപനങ്ങളിൽനിന്നും തങ്ങളുടെ വർക്ക് പെർമിറ്റുകൾ സമാനമായ മറ്റ് സ്വകാര്യ സ്ഥാപനങ്ങളിലേക്ക് മാറ്റാൻ ഇരയാക്കപ്പെടുന്ന തൊഴിലാളികളെ അനുവദിക്കുമെന്ന് അധികൃതർ . പബ്ലിക് അതോറിറ്റി ഫോർ മാൻപവർ ഫോർ വർക്ക്ഫോഴ്സ് പ്രൊട്ടക്ഷൻ സെക്ടർ അഫയേഴ്സിൻ്റെ ആക്ടിംഗ് ഡയറക്ടർ ഡോ. ഫഹദ് അൽ മുറാദ് ആണ് ഇക്കാര്യം വ്യക്തമാക്കിയത് .

തങ്ങളുടെ കീഴിൽ രെജിസ്റ്റർ ചെയ്യപ്പെട്ട തൊഴിലാളികൾക്കുള്ള വേതനം അതത് മാസം തന്നെ അവരുടെ ബാങ്ക് അക്കൗണ്ടുകളിലേക്ക് മാറ്റാൻ തൊഴിലുടമകൾക്കും കമ്പനികൾക്കും ബാധ്യതയുണ്ടെന്നും ഇക്കാര്യത്തിൽ വീഴ്ചവരുത്തുന്നത് ഗുരുതര നിയമ ലംഘനമായി കണക്കാക്കുമെന്നും അധികൃതർ മുന്നറിയിപ്പ് നല്‍കി.

തൊഴിലാളികൾക്ക് വേതനം നൽകുന്നതുമായി ബന്ധപ്പെട്ട  നിയമം 6/2010 ലെ ആർട്ടിക്കിൾ 57 അനുസരിച്ച് അതത് മാസം തന്നെ വേതനം നല്കാൻ തൊഴിലുടമ ബാധ്യസ്ഥരാണ് .

ഇക്കാര്യത്തിൽ നിയമലംഘനം നടത്തുന്ന കമ്പനികളെ നിയമത്തിന്റെ വഴിക്ക് കൊണ്ടുവരാൻ തങ്ങൾ പ്രതിജ്ഞ ബദ്ധരാണെന്നും അതോറിറ്റി കൂട്ടിച്ചേർത്തു .