ഇവന്റെ മുഖം നോക്കിയേ.. പ്രേതമായി വന്നാൽ പേടിച്ച് ചാവില്ലേ : സൗബിന്റെ ബോഡി ഷെയ്മിംഗ് പരാമർശത്തെ വിമർശിച്ച് സോഷ്യൽമീഡിയ

അടുത്തിടെ സംവിധായകന്‍ ജൂഡ് ആന്റണിയ്‌ക്കെതിരെ നടത്തിയ ബോഡി ഷെയ്മിംഗിന്റെ പേരില്‍ മമ്മൂട്ടിയ്ക്ക് കടുത്ത വിമര്‍ശനങ്ങള്‍ നേരിടേണ്ടി വന്നിരുന്നു. ഒടുവില്‍ വിഷയത്തില്‍ മമ്മൂട്ടി പരസ്യമായി മാപ്പ് പറഞ്ഞിരുന്നു. ശേഷം മമ്മൂട്ടി വീണ്ടുമൊരു വിവാദത്തില്‍കൂടെ പെട്ടു. പുതിയ സിനിമയായ ക്രിസ്റ്റഫറിന്റെ പ്രസ് മീറ്റിനിടെയായിരുന്നു വിവാദ സംഭവം.

ഇപ്പോഴിതാ ബോഡി ഷെയ്‌മിങ്ങിന്റെ പേരിൽ വിവാദത്തിൽ പെട്ടിരിക്കുന്നത് നടൻ സൗബിൻ ആണ്. 'രോമാഞ്ചം' എന്ന ചിത്രത്തിന്റെ ഭാഗമായി നടത്തിയ ഒരു പ്രൊമോഷൻ പരിപാടിക്കിടെയാണ് സൗബിന്റെ ബോഡി ഷെയ്മിംഗ് പരാമർശം.

അഭിമുഖത്തിനിടെ നടൻ  അബിൻ ബിനോയെ ചൂണ്ടിക്കാട്ടി 'സിനിമ ഹൊറർ അല്ല കേട്ടോ ഇവന്റെ മുഖം ഒന്ന് ആലോചിച്ച് നോക്കിയേ പ്രേതമായി വന്നാൽ പേടിച്ച് ചാവില്ലേ' എന്നാണ് സൗബിൻ പറഞ്ഞത്. കൊക്ക് എന്റർടൈൻമെന്റ് ചാനലിലെ 'ഒതളങ്ങ തുരുത്ത്' എന്ന സീരീസിലെ നത്ത് എന്ന കഥാപാത്രത്തെ അവതരിപ്പിച്ച് ശ്രദ്ധ നേടിയ താരമാണ് അബിൻ ബിനോ. ഒട്ടേറെ ചിത്രങ്ങളിലും താരം അഭിനയിച്ചിട്ടുണ്ട്. രണ്ടാഴ്ച മുൻപേ പുറത്തിറങ്ങിയ അഭിമുഖത്തിന്റെ ക്ലിപ്പുകൾ സോഷ്യൽമീഡിയയിൽ പ്രചരിച്ചതോടെയാണ് സൗബിനെതിരെ വിമർശനം ഉയർന്നത്.

മമ്മൂട്ടി ഓണ്‍ലൈന്‍ ചാനലുകള്‍ക്കായി നടത്തിയ പ്രസ് മീറ്റിനിടെ നടത്തിയ പരാമർശവും സൗബിന്റെ പരാമർശവും ചൂണ്ടിക്കാട്ടിയാണ് സോഷ്യൽമീഡിയയുടെ വിമർശനം. ക്രിസ്റ്റഫറിന്റെ പ്രൊമോഷൻ പരിപാടിക്കിടെ ചിത്രത്തിലെ പ്രധാന താരങ്ങളില്‍ ഒരാളായ ഐശ്വര്യ ലക്ഷ്മിയുമുണ്ടായിരുന്നു. സംസാരിക്കുന്നതിനിടെ ഐശ്വര്യ ലക്ഷ്മി മമ്മൂട്ടിയെ ചക്കര എന്ന് വിളിച്ചതോടെയായിരുന്നു സംഭവങ്ങളുടെ തുടക്കം.

പിന്നാലെ മമ്മൂട്ടി ഐശ്വര്യയെ കളിയാക്കാനായി നടത്തിയ പരാമര്‍ശമാണ് വിവാദമായിരിക്കുന്നത്. വെളുത്ത പഞ്ചസാര എന്ന് വിളിക്കില്ല, കറുത്ത ശര്‍ക്കര എന്നാണ് വിളിക്കുക. ശര്‍ക്കര എന്ന് വച്ചാല്‍ കരുപ്പെട്ടിയാണ്. ഞാന്‍ തിരിച്ച് അങ്ങനെ വിളിക്കട്ടെ എന്നായിരുന്നു മമ്മൂട്ടി ഐശ്വര്യയുടെ ചക്കരെ വിളിക്ക് നല്‍കിയ മറുപടി. അഭിമുഖത്തിന്റെ ഈ ഭാഗമാണ് ഇപ്പോൾ സോഷ്യല്‍ മീഡിയയില്‍ വൈറലായി മാറിയിരിക്കുന്നത്.

പരോക്ഷമായും തമാശരൂപേണയും മമ്മൂട്ടി നടത്തിയിരിക്കുന്നത് റേസിസ്റ്റ് പരാമര്‍ശമാണെന്നാണ് സോഷ്യല്‍ മീഡിയയുടെ ആരോപണം. പഞ്ചാസരയും ശര്‍ക്കരയുമൊക്കെ മധുരവുമായി ബന്ധപ്പെട്ടതായി മാത്രമേ സാധാരണക്കാര്‍ കാണാറുള്ളൂവെന്നും എന്നാല്‍ അതില്‍ പോലും നിറം നോക്കുന്ന ആളാണ് മമ്മൂട്ടിയെന്നുമാണ് സോഷ്യല്‍ മീഡിയയുടെ വിമര്‍ശനം. സോഷ്യൽമീഡിയയിൽ മമ്മൂട്ടിക്കെതിരെ കടുത്ത വിമർശനമാണ് ഉയരുന്നത്. അതേസമയം മമ്മൂട്ടിയുടെ പരാമര്‍ശം തമാശയായി കാണേണ്ടതേയുള്ളൂവെന്നാണ് ഒരു വിഭാഗത്തിന്റെ അഭിപ്രായം.