യഥാര്‍ത്ഥ പേര് വെളിപ്പെടുത്തി ഉണ്ണി മുകുന്ദന്‍: പേര് മാറ്റിയതിന് പിന്നിലെ കാരണം ഇതാണ്

മലയാളി പ്രേക്ഷകരുടെ പ്രിയപ്പെട്ട താരമാണ് ഉണ്ണി മുകുന്ദന്‍. ആരാധകര്‍ സ്‌നേഹത്തോടെ 'മസിലളിയന്‍' എന്നാണ് ഉണ്ണി മുകുന്ദനെ വിളിക്കുന്നത്. ബോഡി ബില്‍ഡിംഗിലും ഫിറ്റ്‌നസിലും ശ്രദ്ധ കൊടുക്കാറുള്ള താരം സോഷ്യല്‍ മീഡിയയില്‍ പങ്കുവെയ്ക്കാറുള്ള വിശേഷങ്ങളെല്ലാം അതിവേഗം വൈറലാകാറുണ്ട്.

ഉണ്ണി മുകുന്ദന്‍ നായകനായി എത്തിയ ഏറ്റവും പുതിയ ചിത്രമായ 'മാളികപ്പുറം' വിജയകരമായി പ്രദര്‍ശനം തുടരുകയാണ്. 50 കോടി ക്ലബ്ബില്‍ ഇടംനേടിയ ചിത്രം ഉണ്ണി മുകുന്ദന്റെ കരിയറിലെ ഏറ്റവും വലിയ ഹിറ്റായി മാറിയിരുന്നു. ഇപ്പോള്‍ ഇതാ മാളികപ്പുറം എന്ന ചിത്രത്തിന്റെ പ്രൊമോഷന്റെ ഭാഗമായി മനോരമ ഓണ്‍ലൈന് നല്‍കിയ അഭിമുഖത്തില്‍ താരം തന്റെ യഥാര്‍ത്ഥ പേര് വെളിപ്പെടുത്തിയിരിക്കുകയാണ്.

ഉണ്ണി കൃഷ്ണന്‍ എന്നാണ് തന്റെ പേര് എന്ന് ഉണ്ണി മുകുന്ദന്‍ വെളിപ്പെടുത്തി. സിനിമയില്‍ നായകനായി വരികയാണെങ്കില്‍ ഉണ്ണി കൃഷ്ണന്‍ എന്ന പേരിന് ഒരു പഞ്ച് ഉണ്ടാകില്ലെന്ന് എല്ലാവരും പറഞ്ഞു. ഇതോടെ മറ്റ് പല പേരുകളും പരീക്ഷിച്ചു. ഇതിനിടെ അഭയരാജ് എന്ന പേരിടാന്‍ ഏകദേശം തീരുമാനമായിരുന്നു. പൃഥ്വിരാജ് എന്ന പേര് ഹിറ്റായതാണ് അഭയ രാജ് പേരിടാന്‍ തീരുമാനിച്ചതെന്നും ബാബു ജനാര്‍ദ്ദനന്‍ സാറാണ് പേര് മാറ്റുന്ന കാര്യം പറഞ്ഞതെന്നും ഉണ്ണി മുകുന്ദന്‍ പറഞ്ഞു.

ഉണ്ണി എന്ന പേരിനല്ലാതെ മറ്റൊരു പേരിനും തനിയ്ക്ക് റിയാക്ട് ചെയ്യാന്‍ പറ്റുന്നുണ്ടായിരുന്നില്ലെന്നാണ് ഉണ്ണി മുകുന്ദന്‍ പറഞ്ഞത്. അപ്പോള്‍ ബാബു ജനാര്‍ദ്ദനന്‍ സാര്‍ തന്റെ അച്ഛന്റെ പേര് ചോദിച്ചു. മുകുന്ദന്‍ എന്ന് താന്‍ പറഞ്ഞു. അങ്ങനെയാണ് ഉണ്ണി മുകുന്ദന്‍ എന്ന് പേര് മാറ്റാമെന്ന തീരുമാനത്തിലെത്തിയതെന്നും ഉണ്ണി മുകുന്ദന്‍ വെളിപ്പെടുത്തി.