ഇടവേള ബാബു ചേട്ടന്‍ പറഞ്ഞതില്‍ കുഴപ്പമില്ല, മുകുന്ദനുണ്ണിയുടെ നാല് കാര്യങ്ങളില്‍ ഞാനും വിശ്വസിക്കുന്നുണ്ട്: വിനീത് ശ്രീനിവാസന്‍

‘മുകുന്ദന്‍ ഉണ്ണി അസോസിയേറ്റ്‌സ്’ ചിത്രത്തിനെതിരെ ഇടവേള ബാബു ഉന്നയിച്ച വിമര്‍ശനത്തോട് പ്രതികരിച്ച് വിനീത് ശ്രീനിവാസന്‍. ഇടവേള ബാബു പറഞ്ഞ കാര്യങ്ങള്‍ നേരത്തെ തന്നെ നേരിട്ട് വിളിച്ച് പറഞ്ഞിരുന്നു എന്നാണ് വിനീത് ശ്രീനിവാസന്‍ പറയുന്നത്.

സിനിമയ്‌ക്കെതിരെ കടുത്ത വിമര്‍ശനവുമായാണ് ഇടവേള ബാബു രംഗത്ത് എത്തിയിരുന്നത്. സിനിമ മുഴുവനും നെഗറ്റീവാണെന്നും ഇതിന് എങ്ങനെ സെന്‍സര്‍ഷിപ്പ് സര്‍ട്ടിഫിക്കറ്റ് ലഭിച്ചതെന്ന് അറിയില്ല, അതിലെ നായിക ക്ലൈമാക്‌സില്‍ ഉപയോഗിക്കുന്ന വാക്കുകളൊന്നും ഇവിടെ ഉപയോഗിക്കാന്‍ പറ്റില്ല എന്നായിരുന്നു ഇടവേള ബാബു പറഞ്ഞത്.

ഇടവേള ബാബു ചേട്ടന്‍ സിനിമയെ കുറിച്ച് അഭിപ്രായം പറഞ്ഞതില്‍ കുഴപ്പമില്ല. സിനിമ കാണുന്നവര്‍ക്ക് അഭിപ്രായം പറയാന്‍ അവകാശമുണ്ട്. ബാബു ചേട്ടന്‍ തന്നെ നേരിട്ട് വിളിച്ചു പറഞ്ഞ കാര്യങ്ങളാണ് ആ പരിപാടിയിലും പറഞ്ഞത്. സിനിമയെ കുറിച്ച് എല്ലാവരും സംസാരിക്കട്ടെ.

നമ്മുടെ സിനിമയെ കുറിച്ച് ഒരു ചര്‍ച്ച വരുന്നത് നല്ലതാണ്. അത് സന്തോഷമുള്ള കാര്യമാണ് എന്നാണ് വിനീത് ശ്രീനിവാസന്‍ പറയുന്നത്. അതേസമയം, മുകുന്ദനുണ്ണിയുടെ എല്ലാ സ്വഭാവങ്ങളോടും തനിക്ക് യോജിപ്പില്ലെന്നും എന്നാല്‍ ചില കാര്യങ്ങളില്‍ വിശ്വസിക്കുന്നുണ്ടെന്നും വിനീത് വ്യക്തമാക്കി.

മുകുന്ദനുണ്ണി വിശ്വസിക്കുന്ന ആദ്യത്തെ നാലു കാര്യങ്ങള്‍ ഉണ്ടല്ലോ അച്ചടക്കം, അര്‍പ്പണബോധം, സ്ഥിരോത്സാഹം, കഠിനാധ്വാനം, അതില്‍ താന്‍ വിശ്വസിക്കുന്നുണ്ട് ബാക്കി ഒന്നിലും തനിക്ക് വലിയ യോജിപ്പില്ല എന്നാണ് വിനീത് പറയുന്നത്. ‘തങ്കം’ സിനിമയുടെ പ്രമോഷനായി ലോ കോളേജില്‍ എത്തിയപ്പോഴാണ് താരം സംസാരിച്ചത്.