ആണവ നിലയത്തിനു നേരേ റഷ്യന്‍ മിസൈല്‍ ആക്രമണം

കീവ്: യുക്രെയ്നില്‍ വീണ്ടും ആണവ ദുരന്തം തലനാരിഴയ്ക്ക് ഒഴിവായി. ആണവോര്‍ജ നിലയത്തിനു നേരെ റഷ്യ നടത്തിയ മിസൈല്‍ ആക്രമണം റിയാക്ടറുകളെ ബാധിച്ചില്ലെങ്കിലും അനുബന്ധ ഉപകരണങ്ങളും കെട്ടിടങ്ങളും തകര്‍ന്നു.

മിഖോലവ് മേഖലയിലുള്ള രാജ്യത്തെ രണ്ടാമത്തെ വലിയ ആണവ നിലയമായ സൗത്ത് യുക്രെയ്ന്‍ ന്യൂക്ളിയര്‍ പവര്‍ പ്ളാന്റിന്റെ 300 മീറ്റര്‍ അകലെയാണ് മിസൈല്‍ പതിച്ചത്. സ്ഫോടനത്തിന്റെയും തുടര്‍ന്ന് 2 തീഗോളങ്ങള്‍ ഉയരുന്നതിന്റെ ദൃശ്യങ്ങള്‍ പുറത്തുവന്നു. ആണവ ഭീകരപ്രവര്‍ത്തനമാണ് റഷ്യ നടത്തിയതെന്ന് യുക്രെയ്ന്‍ ആരോപിച്ചു.

ജനവാസ കേന്ദ്രങ്ങളിലെ ഷെല്ലാക്രമണവും റഷ്യ ശക്തമാക്കിയിരിക്കുകയാണ്. ഏറ്റവും ഒടുവില്‍ നടന്ന ആക്രമണത്തില്‍ 8 സാധാരണക്കാര്‍ കൊല്ലപ്പെടുകയും 22 പേര്‍ക്ക് പരുക്കേല്‍ക്കുകയും ചെയ്തതായി യുക്രെയ്ന്‍ പ്രസിഡന്റ് വൊളോഡിമിര്‍ സെലെന്‍സ്കി പറഞ്ഞു. വടക്കന്‍ ഹര്‍കിവിലെ ഒരു ഗ്രാമത്തിലുണ്ടായ ഷെല്ലാക്രമണത്തില്‍ 4 ആരോഗ്യപ്രവര്‍ത്തകരും കൊല്ലപ്പെട്ടു.