ചരിത്രത്തിലെ ഏറ്റവും വലിയ കുംഭമേള. ഏറ്റവും കൂടുതൽ ആളുകൾ പങ്കെടുക്കുന്നു എന്ന റിക്കാർഡും ഇത്തവണത്തെ കുംഭമേളയ്ക്ക്

അലഹബാദിലെ മൂന്നു നദികളുടെ സംഗമസ്ഥലമായ 'പ്രയാഗ്‌രാജിൽ ' ഇക്കഴിഞ്ഞ ജനുവരി 15 മുതൽ ആരംഭിച്ച 49 ദിവസം നീണ്ടുനിൽക്കുന്ന കുംഭമേളയിൽ 12 കോടി ആളുകളെത്തുമെന്നാണ് പ്രതീക്ഷിക്കുന്നത്. ഇതിൽ 10 ലക്ഷം വിദേശികളുമുണ്ടാകും.

മാർച് 4 നാണു കുംഭമേളയുടെ സമാപനം. അലഹബാദ് മൂന്നു നദികളുടെ സംഗമസ്ഥലമാണെന്നാണ് ഹൈന്ദവ വിശ്വാസം. ഗംഗ ,യമുന കൂടാതെ സാങ്കൽപ്പിക നദിയായ സരസ്വതിയും സംഗമിക്കുന്നത് ഇവിടെയാണത്രെ.

ഓരോ 12 വര്ഷം കൂടുമ്പോഴുമാണ് കുംഭമേള നടക്കുന്നത്. ഇവിടെ കുംഭമേള നടന്ന് 6 വര്ഷം കഴിയുമ്പോൾ അർദ്ധകുംഭമേള നടക്കാറുണ്ട്. അതനുസരിച് ഇപ്പോൾ നടക്കേണ്ടത് അർദ്ധകുംഭമേളയാണ്. എന്നാൽ ഉത്തർപ്രദേശ് സർക്കാർ അർദ്ധകുംഭമേളക്ക് കുംഭമേളയെന്നും, കുംഭമേളയ്ക്ക് മഹാകുംഭമേളയെന്നും പേരുമാറ്റിയതിന്റെ ഫലമായാണ് ഇപ്പോൾ നടക്കുന്നത് കുംഭമേള എന്നാണറിയപ്പെടാൻ കാരണം.

കുംഭമേളയിൽ പോയി സംഗമത്തിൽ മുങ്ങിക്കുളിച്ചാൽ സർവ്വപാപവും വിട്ടുപോകുമെന്നാണ് ഐതീഹ്യം. ലോകത്തിന്റെ നാനാഭാഗത്തു നിന്നുമുള്ള ലക്ഷക്കണക്കിന് സന്യാസിമാർ പങ്കെടുക്കുന്ന രാജകീയ പുണ്യ സ്നാനം ( ഷാഹി സ്നാൻ) 9 പ്രധാനദിവസങ്ങളിൽ നടക്കുന്നതാണ്. ആദ്യ രാജകീയ പുണ്യസ്നാനം തുടക്കദിവ സമായ ജനുവരി 15 നായിരുന്നു. രണ്ടാമത്തേത് ജനുവരി 21 നും നടന്നു. സന്യാസിമാർ സ്നാനം ചെയ്യുന്നതുമൂലം ഗംഗ കൂടുതൽ പവിത്രയാകുന്നു എന്നാണു വിശ്വാസം.

ഗംഗാദേവി ഭൂമിയിൽ അവതരിക്കാൻ തയ്യാറായിരുന്നില്ലെന്നും സന്യാസിവര്യന്മാർ ഭൂമിയിൽ ശുദ്ധിവരുത്തി യതുമൂലമാണ് ഗംഗാദേവി ഭൂമിയിലേക്കൊഴുകാൻ തയ്യാറായതെന്നും സന്യാസിമാർ ഇന്നും അവകാശപ്പെടു ന്നുണ്ട്. ഭാരതത്തിലെ 13 പ്രമുഖ സന്യാസിമഠങ്ങളിലെ ( അക്കാഡ )പതിനായിരക്കണക്കിന് സന്യാസിമാരാണ് ഇവിടെ തമ്പടിച്ചിരിക്കുന്നത്.

കുംഭമേള നടക്കുന്ന പ്രയാഗ്‌രാജിലാണ് ബ്രഹ്മാണ്ഡത്തിന്റെ ഉദയം എന്നാണ് ഐതീഹ്യം.അതുകൊണ്ടുതന്നെ ഭൂമിയുടെ കേന്ദ്രബിന്ദു അവിടമാണെന്നാണ് വിശ്വാസവും. ഭൂമിയിലെ സൃഷ്ടിക്കു മുൻപ് ബ്രഹ്മദേവൻ പ്രയാഗ്രാജിൽ അശ്വമേധ യജ്ഞം നടത്തിയതായും ഐതീഹ്യങ്ങളിൽ പറയപ്പെടുന്നുണ്ട്.

കുംഭമേളയുടെ ഏരിയ ഇക്കൊല്ലം 45 ചതുരശ്ര കിലോമീറ്ററാണ്. മുൻ വർഷങ്ങളുടെ ഇരട്ടി. ഈ വർഷം 4000 കോടി രൂപയാണ് കുംഭമേളയ്ക്കായി സർക്കാർ ചെലവിടുന്നത്. അതും മുൻവർഷങ്ങളെ അപേക്ഷിച് ഇരട്ടിത്തുകയാണ്. ഈ കുംഭമേളയ്ക്കു ഉത്തർപ്രദേശ് സർക്കാർ വൻ പരസ്യമാണ് ഇത്തവണ നൽകിയിരിക്കുന്നത്.

ഈ മേളയിൽനിന്നു സർക്കാരിന് 1.2 ലക്ഷം കോടി രൂപയുടെ റവന്യൂ വരുമാനമാണ് ലഭിക്കാൻ പോകുന്നത്. ഇതുമൂലം 6 ലക്ഷം പേർക്ക് താൽക്കാലികമായും ആയിരത്തോളം പേർക്ക് സ്ഥിരമായും ജോലിലഭിക്കുന്നതുമാണ്. ആളുകൾക്ക് താമസിക്കാനുള്ള ഏറ്റവും കൂടുതൽ ടെന്റുകളും കൂടാതെ ടോയ്‌ലെറ്റ്കളും സ്ഥാപിക്കപ്പെട്ട റിക്കാർഡും ഇത്തവണ പ്രയാഗ്‌രാജിനാണ്.

ഇത്തവണത്തെ കുംഭമേള ചരിത്രത്തിലെ ഏറ്റവും വലിയ കുംഭമേളയും ഏറ്റവും കൂടുതൽ ആളുകൾ പങ്കെടുക്കുന്നു എന്ന റിക്കാർഡും ഉണ്ടെന്നാണ് സർക്കാർ അവകാശവാദം. വൈവിദ്ധ്യമാർന്ന വേഷഭൂഷാദികളിലും രൂപത്തിലും ഭാവത്തിലുമെത്തുന്ന സന്യാസിമാർ കുംഭമേളയിൽ ഏറ്റവും വലിയ ആകർഷണമാണ്.

ഭാരതത്തിൽ പ്രയാഗ്‌രാജ് ,ഹരിദ്വാർ ,ഉജ്ജയിൻ ,നാസിക്ക് എന്നീ നാലു സ്ഥലങ്ങളിലാണ് കുംഭമേള നടക്കുന്നത്. ഇതിൽ പ്രയാഗരാജ് ഒഴികെ മറ്റെല്ലാ സ്ഥലങ്ങളിലും 12 വർഷത്തിലൊരിക്കൽ മാത്രമാണ് മേള നടക്കുക. എന്നാൽ പ്രയാഗിൽ കുംഭമേളനടന്ന് 6 വര്ഷം കഴിയുമ്പോൾ അർദ്ധകുംഭമേള നടത്തപ്പെടുന്നു.