ന്യൂഡല്ഹി: കോവിഡ് പ്രതിരോധത്തിന് ഗോമൂത്രവും ചാണകവും ഉപയോഗിക്കുന്നത് നല്ലതാണെന്ന അവകാശവാദങ്ങള് തള്ളി ഇന്ത്യന് മെഡിക്കല് അസോസിയേഷന് (ഐഎംഎ). വ്യക്തമായ ശാസ്ത്രീയ തെളിവുകള് ഇക്കാര്യങ്ങളില് ഇതുവരെ പുറത്തുവന്നിട്ടില്ലെന്ന് ഐഎംഎ ദേശീയ പ്രസിഡന്റ് ഡോ. ജെ. ജയലാല് പറഞ്ഞു.
ഗോമൂത്രം കുടിച്ചാല് കോവിഡിനെ പ്രതിരോധിക്കാമെന്ന് യുപിയിലെ ബിജെപി എംഎല്എ അവകാശപ്പെട്ടിരുന്നു. ഇദ്ദേഹം ഗോമൂത്രം കുടിക്കുന്ന വീഡിയോയും പുറത്തുവിട്ടിരുന്നു.
ഗുജറാത്തില് ചില ആളുകള് പശു അഭയകേന്ദ്രങ്ങളില് എത്തി ചാണകവും ഗോമൂത്രവും ദേഹത്ത് തേച്ച് പിടിപ്പിക്കുന്ന ചിത്രങ്ങളും പുറത്തുവന്നിട്ടുണ്ട്. ചാണകവും ഗോമൂത്രവും കോവിഡ് വൈറസിനെതിരായ പ്രതിരോധ ശേഷി വര്ധിപ്പിക്കുമെന്നാണ് ഇവിടങ്ങളിലുള്ളവര് വിശ്വസിച്ചിരിക്കുന്നത്.