മുംബൈ: കോവിഡ് വാക്‌സീന്റെ രണ്ടാമത്തെ ഡോസ് എടുത്ത് മണിക്കൂറുകള്‍ക്കുള്ളില്‍ ഡ്രൈവര്‍ മരിച്ചു. മഹാരാഷ്ട്രയിലെ താനെ ജില്ലയിലാണ് സംഭവം നടന്നത്. സുഖ്‌ദേവ് കിര്‍ഡാത് എന്നയാളാണ് മരിച്ചത്. നേത്രരോഗവിദഗ്ധന്റെ ഡ്രൈവറായി ജോലി ചെയ്തുവരുകയായിരുന്നു ഇയാള്‍.
/sathyam/media/post_attachments/GM9nXzEC6LtDIWL5Db7i.png "publive-image")
ചൊവ്വാഴ്ച രാവിലെ 11 മണിയോടെ വാക്‌സീന്‍ എടുത്ത് കഴിഞ്ഞ് നിരീക്ഷണത്തില്‍ കഴിഞ്ഞപ്പോള്‍ തലകറങ്ങുന്നെന്ന് പരാതിപ്പെട്ടിരുന്നു. തുടര്‍ന്ന് തൊട്ടടുത്തുള്ള ഐ.ജി.എം ആശുപത്രിയിലേക്ക് സുഖ്‌ദേവിനെ കൊണ്ടുപോയെങ്കിലും മരണം സംഭവിച്ചിരുന്നു.
വാക്‌സീന്‍ എടുത്ത് 20 മിനിറ്റിന് ശേഷം തലകറക്കം ആരംഭിച്ചതായി ബിവാന്‍ഡി നിസാംപുര്‍ മുന്‍സിപ്പല്‍ കോര്‍പ്പറേഷന്‍ ആശുപത്രിയിലെ മെഡിക്കല്‍ ഓഫീസര്‍ ഡോ.കെ.ആര്‍ ഖരാത് പറഞ്ഞു. വാക്‌സീനേഷന്‍ കഴിഞ്ഞ് അരമണിക്കൂറിനുള്ളില്‍ മരണം സംഭവിച്ചെന്നും ഡോക്ടര്‍ വ്യക്തമാക്കി.
സുഖ്‌ദേവിന് രക്തസമ്മര്‍ദ്ദം സംബന്ധിച്ച ആരോഗ്യപ്രശ്‌നങ്ങളുണ്ടായിരുന്നതായി കുടുംബാംഗങ്ങള്‍ പറയുന്നു. മരണകാരണം എന്താണെന്ന് അറിയാന്‍ പോസ്റ്റുമോര്‍ട്ടം റിപ്പോര്‍ട്ടിനായി കാത്തിരിക്കുകയാണെന്നും ഇവര്‍ പറഞ്ഞു. മൃതദേഹം മുംബൈയിലെ ജെ.ജെ ആശുപത്രിയില്‍ ഫോറന്‍സിക് പരിശോധനയ്ക്ക് വിധേയമാക്കും.
വിശദമായ പോസ്റ്റുമോര്‍ട്ടം റിപ്പോര്‍ട്ട് ലഭിച്ച ശേഷമേ മരണകാരണം വ്യക്തമാകൂ എന്ന് അധികൃതര്‍ പറഞ്ഞു. വാക്‌സീന്‍ എടുക്കും മുമ്പ് സുഖ്‌ദേവിന്റെ പള്‍സും രക്തസമ്മര്‍ദ്ദവും നോര്‍മലായിരുന്നെന്ന് വാക്‌സിനേഷന്‍ കേന്ദ്രമായ ബിഹാന്‍വാഡി ആശുപത്രിയിലെ അധികൃതര്‍ അറിയിച്ചു.
Follow Us/sathyam/media/agency_attachments/5VspLzgrB7PML1PH6Ix6.png)
