ടിപ്പുവിനെതിരെ ഗുരുതരമായ ആരോപണം: മുഖത്ത് കരിതേച്ച് മുഖം വികൃതമാക്കിയ നിലയിൽ പോസ്റ്റർ

ഡല്‍ഹി: ഓരോ പുതിയ ചിത്രങ്ങളുടെയും വിശേഷങ്ങൾ ഓരോന്നും സമൂഹ മാധ്യമങ്ങളിൽ വളരെ ചുരുങ്ങിയ സമയം കൊണ്ട് ഇടം നേടാറുണ്ട്. ചില സിനിമകൾ പലപ്പോഴും വിവാദങ്ങൾക്കിടയാകാറുമുണ്ട്. ഇപ്പോഴിതാ സിനിമയുടെ ഏറ്റവും പുതിയ മോഷൻ പോസ്റ്റർ പുറത്തുവിട്ടതോടെ ചിത്രം വലിയ വിമർശനങ്ങളും വിവാദങ്ങളും നേരിടുകയാണ്.

മൈസൂർ രാജാവായിരുന്ന ടിപ്പു സുൽത്താനെ വിമര്ശിച്ചുകൊണ്ടാണ് ബോളിവുഡിൽ സിനിമ വരുന്നത്. 'ടിപ്പു' എന്നാണ് സിനിമയുടെ പേര്. സിനിമയുടെ ഏറ്റവും പുതിയ മോഷൻ പോസ്റ്റർ പുറത്തു വിട്ടിരിക്കുകയാണ് അണിയറപ്രവർത്തകർ.

ടിപ്പുവിനെതിരെ ഗുരുതരമായ ആരോപണങ്ങളും വിമർശനങ്ങളുമാണ് മോഷൻ പോസ്റ്ററിൽ ഉന്നയിച്ചിരിക്കുന്നത്. ടിപ്പുവിന്റെ മുഖത്ത് കരിതേച്ച് മുഖം വികൃതമാക്കിയ നിലയിലാണ് പോസ്റ്റർ തയ്യാറാക്കിയിട്ടുള്ളത്. 'മതഭ്രാന്തനായ സുൽത്താന്റെ കഥ' എന്ന ടാഗിലായിരിക്കും സിനിമ എത്തുന്നത്.

ഇറോസ് ഇന്റർനാഷണലും രശ്മി ശർമ്മ ഫിലിംസും ചേർന്നാണ് സിനിമയുടെ അവതരണം. 'പി.എം. നരേന്ദ്ര മോദി', 'ബാൽ ശിവജി' എന്നീ സിനിമകൾ നിർമ്മിച്ച സന്ദീപ് സിങ്ങും രശ്മി ശർമ്മയും ചേർന്നാണ് സിനിമയുടെ നിർമ്മാണം. അതോടൊപ്പം ഹിന്ദി, കന്നഡ, തമിഴ്, തെലു​ങ്ക്, മലയാളം എന്നീ ഭാഷകളിൽ സിനിമ റിലീസ് ചെയ്യും. ഇതിനിടയിൽ സിനിമയുടെ മോഷൻ പോസ്റ്ററിനെതിരെ വിമർശനങ്ങളാണ് ഉയരുന്നത്.