2020 ട്രാക്സ് ക്രൂയിസര് മോഡല് ഇന്ത്യയില് അവതരിപ്പിക്കാനൊരുങ്ങുകയാണ് ഫോഴ്സ് മോട്ടോര്സ്. ബിഎസ് VI എഞ്ചിന് കരുത്തിലാണ് പുതിയ വാഹനം വിപണിയില് എത്തുന്നത്.
2020 ഓട്ടോ എക്സ്പോയില് അവതരിപ്പിച്ച ഗൂര്ഖ ഉള്പ്പടെ ഏതാനും മോഡലുകള് ബ്രാന്ഡില് നിന്നും വിപണിയില് എത്തും. പരീക്ഷണയോട്ടം നടത്തുന്ന ഈ മോഡലുകളുടെയെല്ലാം ചിത്രങ്ങളും വാര്ത്തകളും പുറത്ത് വന്നിരുന്നു.
ഇതിന് പിന്നാലെയാണ് ഇപ്പോള് ട്രാക്സ് ക്രൂയിസര് മോഡലിന്റെയും പരീക്ഷണ ചിത്രങ്ങള് പുറത്തുവരുന്നത്. റഷ്ലൈന് ആണ് പരീക്ഷണയോട്ടം നടത്തുന്ന വാഹനത്തിന്റെ ചിത്രങ്ങള് പങ്കുവെച്ചിരിക്കുന്നത്.
കര്ണാടകയിലെ ഉഡുപ്പിയില് പരീക്ഷണയോട്ടത്തിനിടെയാണ് വാഹനം ക്യാമറക്കണ്ണില് കുടുങ്ങിയത്. മൂടിക്കെട്ടലുകള് ഒന്നും ഇല്ലാതെയായിരുന്നു പരീക്ഷണയോട്ടം. ഇതൊരു പ്രൊഡക്ഷന് സ്പെക്കാണെന്നും റിപ്പോര്ട്ടില് പറയുന്നു.
മധ്യപ്രദേശ് രജിസ്ട്രേഷന് നമ്പറുള്ള മഞ്ഞ ലൈസന്സ് പ്ലേറ്റ് കാണാന് സാധിക്കും. ട്രാക്സ് നിര്മ്മാണ പ്ലാന്റ് സ്ഥിതിചെയ്യുന്ന സ്ഥലമാണ് മധ്യപ്രദേശിലെ പീതാംപൂര്. പരീക്ഷണയോട്ടം നടത്തുന്ന വാഹനത്തിന്റെ ചിത്രങ്ങള് നേരത്തെയും പുറത്തുവന്നിരുന്നു.
ആ വാഹനങ്ങളില് ചുവന്ന ലൈസന്സ് പ്ലേറ്റുകള് ആയിരുന്നു കണ്ടിരുന്നത്. കമ്പനിയുടെ ഔദ്യോഗിക വെബ്സൈറ്റില് ഇതിനോടകം തന്നെ വാഹനം ഇടംപിടിച്ചിട്ടുണ്ട്. എന്നാല് അവതരണം സംബന്ധിച്ച് വ്യക്തമായ ഒരു തീയതി കമ്പനി വെളിപ്പെടുത്തിയിട്ടില്ല.