മിക്കവരുടെയും സംശയമാണ് ചോറാണോ ചപ്പാത്തിയാണോ ഭാരം കുറയ്ക്കുന്നതിന് സഹായിക്കുന്നതെന്ന്. ഇവക്ക് രണ്ടിനും അവയുടെതായ ഗുണങ്ങളും ന്യൂനതകളുമുണ്ട്.
രണ്ടും കാർബോ ഹൈഡ്രേറ്റിലും കലോറി മൂല്യത്തിലും തുല്യരാണ്. എന്നാൽ പോഷണ മൂല്യത്തിൽ വ്യത്യാസമുണ്ട്. അരിഭക്ഷണത്തെ അപേക്ഷിച്ച് ചപ്പാത്തി പ്രോട്ടീൻ, ഫൈബർ എന്നിവയാൽ സമ്പന്നമാണ്. ഇത് കൂടുതൽ ഉൗർജദായകമാണ്.
എന്നാൽ അന്നജത്തിന്റെ സാന്നിധ്യം കാരണം ദഹനത്തിന് ഏറെ സഹായകമാണ് അരിഭക്ഷണം.
പോഷക ഗുണം പരിഗണിച്ചാൽ ചപ്പാത്തിയാണ് ചാമ്പ്യൻ. എന്നാൽ സോഡിയത്തിന്റെ അംശം ചപ്പാത്തിയിൽ കൂടുതലാണ്. 120 ഗ്രാം ഗോതമ്പിൽ 190 മില്ലിഗ്രാം സോഡിയം അടങ്ങിയിട്ടുണ്ട്. എന്നാൽ അരിയിൽ സോഡിയം ഇല്ല.
ചപ്പാത്തിയുടെ ഒാരോ അംശവും നിങ്ങളുടെ ശരീരത്തിന് കാൽസ്യം, പൊട്ടാസ്യം, ഇരുമ്പ്, ഫോസ്ഫറസ് എന്നീ ഘടകങ്ങൾ നൽകുന്നു.എന്നാൽ ചോറിൽ കാൽസ്യം ഇല്ല. പൊട്ടാസ്യം, ഫോസ്ഫറസ് എന്നിവയുടെ സാന്നിധ്യം കുറവുമാണ്.
ചോറിൽ ചപ്പാത്തിയെ അപേക്ഷിച്ച് ഫൈബർ അംശം കുറവാണ്. ചപ്പാത്തിയിൽ ഉയർന്ന അളവിൽ പ്രോട്ടീനും ഫൈബറും അടങ്ങിയിരിക്കുന്നു. ചപ്പാത്തി ഫൈബറിനാൽ സമ്പുഷ്ടമായതിനാൽ വിശക്കാതെ കൂടുതൽ സമയം നിൽക്കാൻ സഹായിക്കുന്നു. അതിനാൽ അവ ഭാരക്കുറവിനും സഹായിക്കുന്നു.
ദഹിക്കാൻ കൂടുതൽ സമയമെടുക്കുമെന്നതിനാൽ നിങ്ങളുടെ രക്തത്തിലെ പഞ്ചസാരയുടെ അളവിനെ യഥാവിധം നിലനിർത്താൻ ചപ്പാത്തി സഹായിക്കുന്നു.
രാത്രിയില് ചപ്പാത്തി നാലില് കൂടുതല് കഴിക്കരുത്. വൈകിട്ട് ഏഴരയോടെ രാത്രി ഭക്ഷണം കഴിക്കുകയും വേണം. ഇനി ചോറാണ് കഴിക്കുന്നതെങ്കില് തവിട്ടു നിറത്തിലുള്ള അരിയാണ് ഉപയോഗിക്കേണ്ടത്.