ന്യൂഡല്ഹി: ഡല്ഹി കലാപത്തിനു കാരണമായെന്നു കരുതപ്പെടുന്ന വിദ്വേഷ പ്രസംഗത്തെ ന്യായീകരിച്ച് ബിജെപി നേതാവ് കപില് മിശ്ര. താന് തെറ്റൊന്നും ചെയ്തിട്ടില്ലെന്നും പൗരത്വ നിയമ ഭേദഗതിയെ പിന്തുണയ്ക്കുക മാത്രമാണു ചെയ്തതെന്നും കപില് മിശ്ര പറഞ്ഞതായി പിടിഐ വാര്ത്താ ഏജന്സി റിപ്പോര്ട്ട് ചെയ്തു.
ഫോണിലൂടെ നിരവധി പേര് വധഭീഷണി മുഴക്കി. രാഷ്ട്രീയക്കാരും മാധ്യമപ്രവര്ത്തകരും ഉള്പ്പെടെ നിരവധി പേര് തന്നെ കുറ്റംപറയുന്നു. എന്നാല് താന് അതില് ഭയപ്പെടുന്നില്ല. കാരണം താന് തെറ്റൊന്നും ചെയ്തിട്ടില്ല എന്ന് കപില് മിശ്ര പറഞ്ഞതായാണ് പിടിഐ റിപ്പോര്ട്ട് ചെയ്തത്. ഞായറാഴ്ച കപില് മിശ്രയുടെ നേതൃത്വത്തില് പൗരത്വഭേദഗതി ബില് സമരങ്ങള്ക്കെതിരായ റാലി ഡല്ഹിയിലെ ജാഫറാബാദില് നടത്തിയിരുന്നു. ഈ റാലിയില് പ്രകോപനപരമായ പ്രസംഗമാണ് മിശ്ര നടത്തിയത്. മാത്രമല്ല, ജാഫറാബാദില് മറ്റൊരു ഷഹീന്ബാഗ് ഉണ്ടാകാന് അനുവദിച്ചു കൂടാ എന്ന് ട്വീറ്റ് ചെയ്യുകയും ചെയ്തു.