കോട്ടയം: ഒരു ഞായറാഴ്ച പതിവുപോലെ ഉമ്മന്ചാണ്ടിയെ കാണാനെത്തിയതാണ് പനച്ചിക്കാട് സ്വദേശിയും മണ്ഡലം കോണ്ഗ്രസ് പ്രസിഡന്റുമായിരുന്ന വട്ടമല വിഎം മാത്യു. കഞ്ഞിമുക്കി തേച്ച ഖദര് ഷര്ട്ടും മുണ്ടുമാണ് മാത്യുവിന്റെ വേഷം. മണ്ഡലം പ്രസിഡന്റ് എന്നതിനപ്പുറം ഉമ്മന്ചാണ്ടിയുടെ സുഹൃത്തുകൂടിയായിരുന്നു മാത്യു.
ഉമ്മന്ചാണ്ടി അന്ന് ധനമന്ത്രി. രാവിലെ പതിവുപോലെ സന്ദര്ശകര്ക്ക് നടുവിലായിരുന്നു ഉമ്മന്ചാണ്ടി. എല്ലാവരെയും കണ്ട് തിരക്കിട്ട് മാത്യുവിനോട് സംസാരിച്ച് പുറത്തേക്ക് പോകാന് മന്ത്രിയായ ഉമ്മന്ചാണ്ടിയുടെ ഷര്ട്ട് കണ്ട മാത്യു ഞെട്ടി.
കരിമ്പന് കയറിയും കീറിയും മോശമായ ഷര്ട്ട്. ഈ ഷര്ട്ടിട്ടാണോ കുഞ്ഞൂഞ്ഞേ യാത്രയെന്ന് ചോദിച്ച മാത്യുവിനെയും കാരില് കയറ്റി ഉമ്മന്ചാണ്ടി. പിന്നെ ഷര്ട്ടൂരി നല്കാന് മാത്യുവിനോട് ഉമ്മന്ചാണ്ടി ആവശ്യപ്പെട്ടു.
മാത്യു ഷര്ട്ടൂരി നല്കിയതോടെ പത്തനംതിട്ടയിലെ പൊതുപരിപാടിയില് ആ ഷര്ട്ടിട്ട് ഉമ്മന്ചാണ്ടി പങ്കെടുത്തു, അടുത്ത പരിപാടി അന്ന് അടൂര് എംഎല്എയായിരുന്ന തിരുവഞ്ചൂര് രാധാകൃഷ്ണന്റെ മണ്ഡലത്തില്. ഉമ്മന്ചാണ്ടി ഊരി നല്കിയ ഷര്ട്ടിട്ടാണ് മാത്യു ഈ സമയം കാറിലിരുന്നത്.
രാത്രി വൈകി മാത്യുവിനെ വീട്ടില് കൊണ്ടാക്കിയാണ് ഉമ്മന് ചാണ്ടി മടങ്ങിയത്. ഒരാഴ്ചയ്ക്ക് ശേഷം തന്റെ ഷര്ട്ട് അലക്കിത്തേച്ച് തിരികെ വീട്ടില് എത്തിക്കാനും ഉമ്മന്ചാണ്ടി മറന്നില്ല. അതായിരുന്നു ഉമ്മന്ചാണ്ടി.