ന്യൂഡല്ഹി: ഡല്ഹി അതിര്ത്തികളില് മറുനാടന് തൊഴിലാളികള് കൂട്ടപ്പലായനം നടത്തുന്നതില് രാഷ്ട്രീയം പറഞ്ഞ ഉത്തര്പ്രദേശ് സര്ക്കാരിനെതിരേ വിമര്ശനവുമായി ഡല്ഹി ഉപമുഖ്യമന്ത്രി മനീഷ് സിസോദിയ. മഹാമാരിയുടെ കാലത്തും ബിജെപി രാഷ്ട്രീയം കളിക്കുകയാണെന്നു സിസോദിയ കുറ്റപ്പെടുത്തി.
ആളുകള് കൊറോണ ഭീതിയിലാഴ്ന്നിരിക്കുന്ന സമയത്തും രാഷ്ട്രീയം കുത്തി നിറയ്ക്കുന്ന ബിജെപി നേതാക്കളുടെ പ്രവണത വേദനാജനകമാണ്. ആംആദ്മി സര്ക്കാര് വെള്ളവും വൈദ്യുതിയും വിച്ഛേദിച്ചതുകൊണ്ടാണ് തൊഴിലാളികള്ക്ക് ഡല്ഹി വിടേണ്ടി വന്നതെന്നാണ് യോഗി ആദിത്യനാഥ് സര്ക്കാര് ആരോപിക്കുന്നത്.
മഹാമാരിക്കെതിരെ സംസ്ഥാനങ്ങളും സര്ക്കാരുകളും ഒരുമിച്ച് നിന്ന് രാജ്യത്തെ രക്ഷിക്കാന് പ്രവര്ത്തിക്കേണ്ട സാഹചര്യത്തിലാണ് ബിജെപി വൃത്തികെട്ട രാഷ്ട്രീയം കളിക്കുന്നതെന്ന് സിസോദിയ ട്വീറ്റ് ചെയ്തു.
ഡല്ഹി അതിര്ത്തിയിലെത്തിയ ആളുകളെല്ലാം ഈ നഗരത്തില് മാത്രമുള്ളവരല്ലെന്നും രാജസ്ഥാന്, പഞ്ചാബ്, ഹരിയാന എന്നിവിടങ്ങളിലുള്ളവര് ഈ സംഘത്തിലുണ്ടെന്നും സിസോദിയ കൂട്ടിച്ചേര്ത്തു. ഡല്ഹിയില്നിന്ന് ഉത്തര്പ്രദേശിലേക്ക് ആയിരങ്ങള് കൂട്ടത്തോടെ പലായനം ചെയ്യുന്ന സാഹചര്യത്തിലാണു സിസോദിയയുടെ പ്രതികരണം.
ഡല്ഹി-യു.പി അതിര്ത്തിയായ ഗാസിപ്പുര്, വസീര്പുര്, ഹരിയാണ അതിര്ത്തിയായ ഗുഡ്ഗാവ്, ബദര്പുര് തുടങ്ങിയ ഇടങ്ങളിലാണ് ആയിരങ്ങള് തമ്പടിച്ചിരിക്കുന്നത്.