കേജ്രിവാളിന്റെ അറസ്റ്റിലും കോൺഗ്രസിന്റെ അക്കൗണ്ട് മരവിപ്പിക്കലിലും ഇന്ത്യയ്ക്കെതിരെ അമേരിക്ക; ന്യായവും സുതാര്യവും സമയ ബന്ധിതവുമായ നിയമ നടപടികളെ പ്രോത്സാഹിപ്പിക്കുന്നുവെന്ന് യുഎസ്

ഡൽഹി: അരവിന്ദ് കേജ്‌രിവാളിന്റെ അറസ്റ്റിലും കോൺഗ്രസിന്റെ അക്കൗണ്ട് മരവിപ്പിച്ച നടപടിയിലും ഇന്ത്യയുടെ നിലപാടുകൾ സൂക്ഷ്മമായി നിരീക്ഷിക്കുന്നുവെന്ന് അമേരിക്ക. നേരത്തെ അമേരിക്കൻ സ്റ്റേറ്റ് ഡിപ്പാർട്ട്‌മെന്റിന്റെ ഈ പരാമർശത്തെ തുടർന്ന് യുഎസ് നയതന്ത്രജ്ഞനെ ഇന്ത്യ  വിളിച്ചുവരുത്തിയിരുന്നു.

തുടർന്ന് എതിർപ്പറിയിച്ച ഇന്ത്യയുടെ നടപടിക്ക് മണിക്കൂറുകൾക്ക് ശേഷമാണ് ഇന്ത്യയുടെ നടപടികൾ സൂക്ഷ്മമായി പിന്തുടരുന്നുവെന്നും ന്യായവും സുതാര്യവും സമയബന്ധിതവുമായ നിയമ നടപടികളെ പ്രോത്സാഹിപ്പിക്കുന്നുവെന്നും യുഎസ് ആവർത്തിച്ചിരിക്കുന്നത്. 

“ഡൽഹി മുഖ്യമന്ത്രി അരവിന്ദ് കെജ്‌രിവാളിന്റെ അറസ്റ്റ് ഉൾപ്പെടെയുള്ള നടപടികൾ ഞങ്ങൾ സൂക്ഷ്മമായി പിന്തുടരുന്നു. വരാനിരിക്കുന്ന തെരഞ്ഞെടുപ്പുകളിൽ ഫലപ്രദമായി പ്രചാരണം നടത്തുന്നതിന് വെല്ലുവിളിയുണ്ടാക്കുന്ന തരത്തിൽ നികുതി അധികാരികൾ ചില ബാങ്ക് അക്കൗണ്ടുകൾ മരവിപ്പിച്ചുവെന്ന കോൺഗ്രസ് പാർട്ടിയുടെ ആരോപണങ്ങളും ഞങ്ങൾക്കറിയാം.

ഈ പ്രശ്‌നങ്ങൾക്കെല്ലാം ന്യായവും സുതാര്യവും സമയബന്ധിതവുമായ നിയമനടപടികൾ ഞങ്ങൾ പ്രോത്സാഹിപ്പിക്കുന്നു,” യുഎസ് സ്റ്റേറ്റ് ഡിപ്പാർട്ട്‌മെന്റ് വക്താവ് മാത്യു മില്ലർ പറഞ്ഞു.

കെജ്‌രിവാളിന്റെ അറസ്റ്റിനെക്കുറിച്ചുള്ള അഭിപ്രായങ്ങൾ, കോൺഗ്രസിന്റെ ബാങ്ക് അക്കൗണ്ട് മരവിപ്പിച്ചതുൾപ്പെടെയുള്ള സമീപകാല രാഷ്ട്രീയ കോളിളക്കങ്ങൾ, പ്രതിപക്ഷത്തിനെതിരെയുള്ള അടിച്ചമർത്തൽ തെരഞ്ഞെടുപ്പിന് മുമ്പായി പ്രതിസന്ധി ഘട്ടത്തിലെത്തിയെന്ന ആംനസ്റ്റി ഇന്റർനാഷണലിന്റെ പ്രസ്താവന എന്നിവയെക്കുറിച്ചുള്ള അഭിപ്രായങ്ങളിൽ യുഎസ് നയതന്ത്രജ്ഞനെ ഇന്ത്യ വിളിച്ചുവരുത്തിയതിനെക്കുറിച്ചുള്ള ചോദ്യത്തിന് മറുപടി പറയുകയായിരുന്നു അദ്ദേഹം. .

" ഒരു സ്വകാര്യ നയതന്ത്ര സംഭാഷണത്തെ കുറിച്ച് സംസാരിക്കാൻ ആഗ്രഹിക്കുന്നില്ല, പക്ഷേ തീർച്ചയായും ഞങ്ങൾ പരസ്യമായി പറഞ്ഞത് അങ്ങനെ തന്നെയാണ്, ഞങ്ങൾ ന്യായവും സുതാര്യതയും പ്രോത്സാഹിപ്പിക്കുന്നു, സമയോചിതമായ നിയമ നടപടികൾ. ആരും അതിനെ എതിർക്കണമെന്ന് ഞങ്ങൾ കരുതുന്നില്ല, ”അദ്ദേഹം പറഞ്ഞു.