വീട്ടിലും ഓക്സിജൻ സിലണ്ടർ വേണം, 'അമ്മ' സഹായിക്കില്ലന്നു പറഞ്ഞു; മമ്മൂട്ടി പൈസ തന്നു സഹായിച്ചു എന്നൊക്കെ പ്രചരിപ്പിച്ചിരുന്നു : മോളി കണ്ണമാലിയുടെ കുടുംബാംഗത്തിന്റെ വെളിപ്പെടുത്തൽ

ഗുരുതരമായ ആരോഗ്യപ്രശ്നങ്ങളെത്തുടർന്ന് ആശുപത്രിയിൽ കഴിഞ്ഞിരുന്ന നടി മോളി കണ്ണമാലി ഇപ്പോൾ വീട്ടിൽ തിരിച്ചെത്തിയിരിക്കുകയാണ്. നടിയുടെ ചികിത്സയ്ക്ക് ആവശ്യമായ സാമ്പത്തിക സഹായത്തിനായി കുടുംബാംഗങ്ങൾ മുന്നോട്ട് വന്നിരുന്നു. നടിയുടെ അവസ്ഥ താര സംഘടനയായ ‘അമ്മ’യെ അറിയിച്ചിരുന്നെങ്കിലും അംഗമല്ലാത്തതിനാൽ ഒരു സഹായവും ചെയ്യാൻ കഴിയില്ലെന്നായിരുന്നു ലഭിച്ച മറുപടിയെന്ന് പറയുകയാണ് ഒരു ഓൺലൈൻ മീഡിയക്ക് നൽകിയ അഭിമുഖത്തിൽ മോളി കണ്ണമാലിയുടെ കുടുംബാംഗം.

സിനിമാമേഖലയിൽ നിന്നുള്ള സഹായത്തേക്കാൾ കൂടുതൽ ലഭിച്ചത് ജനങ്ങളിൽ നിന്നാണെന്ന് മോളി കണ്ണമാലിയുടെ കുടുംബാംഗങ്ങൾ പറഞ്ഞു. നടിയെ ആശുപത്രിയിൽ പ്രവേശിപ്പിച്ചതിന് ശേഷം കയ്യിൽ പണമില്ലാതിരുന്നതിനാൽ ജോയ് മാത്യുവിനെ കാര്യം അറിയിച്ചു. അദ്ദേഹമാണ് ആദ്യം ഇക്കാര്യം ഫെയ്സ്ബുക്കിൽ പോസ്റ്റ് ചെയ്യുന്നത്. അത് കഴിഞ്ഞ് നിരവധിയാളുകൾ അവസ്ഥ അറിയിച്ചുകൊണ്ട് വീഡിയോയും പോസ്റ്റുമൊക്കെയിട്ടു. ബിനീഷ് ബാസ്റ്റിൻ, ദിയ സന, ഫിറോസ് കുന്നുംപറമ്പിൽ തുടങ്ങി ഒരുപാട് പേർ ഈ രീതിയിൽ സഹായിച്ചു.

അമ്മച്ചിയുടെ അവസ്ഥ ‘അമ്മ’ സംഘടനയെ അറിയിച്ചിരുന്നു. എന്നാൽ അംഗമല്ലാത്തത് കൊണ്ട് ഒരു സഹായവും ചെയ്യാൻ പറ്റില്ലെന്നാണ് പറഞ്ഞത്. സിനിമാ മേഖലയിൽ നിന്നും ബാല, പ്രേംകുമാർ ഇവരൊക്കെ സഹായിച്ചിരുന്നു. അമ്മച്ചിയുടെ അവസ്ഥ ബാല സാറിനെ വിളിച്ച് പറഞ്ഞപ്പോൾ അപ്പോൾ തന്നെ വീട്ടിലേക്ക് വരാൻ പറഞ്ഞു. ചെന്നയുടൻ പതിമൂവായിരം രൂപയുടെ ചെക്ക് തന്നു. സിനിമാമേഖലയിൽ നിന്നുള്ള സഹായത്തേക്കാൾ കൂടുതൽ പ്രേക്ഷകരാണ് സഹായിച്ചത്.

വീട്ടിലും ഓക്സിജൻ സിലണ്ടർ വേണം. മന്ത്രി വീണ ജോർജ് ഇടപെട്ടാണ് ഓക്സിജൻ സിലണ്ടർ കിട്ടിയത്. കടലിൽ പണിയില്ലാത്തപ്പോൾ വേറെ വരുമാനം ഒന്നുമില്ല. കുട്ടികളും മുതിർന്നവരുമായി 9 പേരാണ് ഒരു വീട്ടിൽ കഴിയുന്നത്.  കെ.വി. തോമസ് സാറിന്റെ ഫണ്ടിൽ നിന്നും അനുവദിച്ച തുക കൊണ്ട് ഉണ്ടാക്കിയ ചെറിയ ഒരു വീട് മാത്രമാണ് ഞങ്ങൾക്ക് ഉള്ളത്. പലരും മമ്മൂട്ടി സർ വലിയ പൈസ തന്നു സഹായിച്ചു എന്നൊക്കെ പ്രചരിപ്പിച്ചിരുന്നു. അത് കാരണം മമ്മൂട്ടി സഹായിച്ചില്ലേ ചോദിച്ച് പലരും സഹായം തരാതെയിരുന്നിട്ടുണ്ട്. ഡിസ്ചാർജ് ചെയ്യാൻ നേരം അദ്ദേഹം അമ്പതിനായിരം രൂപ തന്നത് മറക്കാനാകില്ല’’. –  മോളി കണ്ണമാലിയുടെ ബന്ധു പറഞ്ഞു.