വൃക്കകളുടെ ആരോഗ്യം നിലനിർത്തേണ്ടതിന്റെ ആവശ്യകത മനസ്സിലാക്കാം..

വിഷവസ്തുക്കളുടെ രക്തം ശുദ്ധീകരിക്കുകയും മാലിന്യങ്ങളെ മൂത്രമാക്കി മാറ്റുകയും ചെയ്യുക എന്നതാണ് വൃക്കകളുടെ പ്രധാന ധർമ്മം. മാത്രമല്ല രക്തസമ്മർദ്ദം നിയന്ത്രിക്കുകയും ചുവന്ന രക്താണുക്കളെ നിർമ്മിക്കുകയും ശരീരത്തിലെ പിഎച്ച് അളവ് നിയന്ത്രിക്കുകയും ചെയ്യുന്നു.

വിഷവസ്തുക്കളെയും മാലിന്യങ്ങളെയും പുറന്തള്ളുക എന്നതാണ് വൃക്കകളുടെ പ്രധാന പ്രവർത്തനം. എന്നാൽ വൃക്കകളുടെ പ്രവർത്തനം തരാറിലാകുമ്പോൾ ശരീര കോശങ്ങളിൽ അധിക വെള്ളവും ഉപ്പും അടിഞ്ഞുകൂടുന്നതിനൊപ്പം വിഷവസ്തുക്കളും മാലിന്യങ്ങളും അടിഞ്ഞു കൂടുന്നു. ഇത് മുഖത്തും കാലുകളിലും വീക്കത്തിനും കണ്ണുകൾക്ക് ചുറ്റുമുള്ള വീക്കത്തിനും കാരണമാകും.

വൃക്കകൾ ശരിയായി പ്രവർത്തിക്കാത്തപ്പോൾ അത് മൂത്രനാളിയിൽ ക്രമക്കേടുകൾക്ക് കാരണമാകും. ചില ആളുകൾക്ക് ഇടയ്ക്കിടെ മൂത്രമൊഴിക്കൽ അനുഭവപ്പെടാം. മറ്റുള്ളവർക്ക് അവരുടെ മൂത്രത്തിൽ രക്തം കണ്ടേക്കാം. നുരയും കുമിളയും നിറഞ്ഞ മൂത്രവും വൃക്ക തകരാറിനെ സൂചിപ്പിക്കാം. നമ്മുടെ ശരീരത്തിലെ ദ്രാവകം സന്തുലിതമാക്കുന്നതിന് വൃക്കകൾ സഹായിക്കുന്നു.

വൃക്കസംബന്ധമായ പ്രശ്നങ്ങൾ ശ്വാസകോശത്തിൽ ദ്രാവകം അടിഞ്ഞുകൂടുന്നതിന് ഇടയാക്കും, ഇത് ശ്വാസതടസ്സത്തിന് കാരണമാകും. ചൊറിച്ചിലും വരണ്ട ചർമ്മവും വൃക്കരോഗത്തിന്റെ ലക്ഷണമാകാം. രക്തത്തിലെ ധാതുക്കളുടെയും പോഷകങ്ങളുടെയും അസന്തുലിതാവസ്ഥയെ ഇത് സൂചിപ്പിക്കുന്നു. രക്തത്തിലെ ഫോസ്ഫറസിന്റെ അളവ് പെട്ടെന്ന് ഉയരുന്നതും ഇതിന് കാരണമാകാം.