സമ്മർദ്ദത്തിനും ഉത്കണ്ഠയ്ക്കും കാരണമാകുന്ന ഭക്ഷണങ്ങൾ ഏതൊക്കെയാണെന്ന് മനസ്സിലാക്കാം..

ചില ഭക്ഷണങ്ങൾ ഉത്കണ്ഠയെ സ്വാഭാവികമായി ചികിത്സിക്കാൻ സഹായിക്കും, മറ്റുള്ളവ ഉത്കണ്ഠയും സമ്മർദ്ദവുമുള്ള മാനസികാവസ്ഥ കൂടുതൽ വഷളാക്കും. മറ്റൊരു വിധത്തിൽ പറഞ്ഞാൽ, നിങ്ങളുടെ ഭക്ഷണക്രമത്തിൽ ചെറിയ മാറ്റങ്ങൾ വരുത്തുന്നത് ഉത്കണ്ഠയും സമ്മർദ്ദവും കൂട്ടുന്നതിനും കുറയ്ക്കുന്നതിനും കാരണമാകും.

പഞ്ചസാരയുടെ അമിതമായ ഉപയോ​ഗം ഉത്കണ്ഠയ്ക്ക് കാരണമാകുന്നു. കേക്കുകൾ, പേസ്ട്രികൾ എന്നിവ പോലുള്ള ഭക്ഷണങ്ങൾ നിങ്ങളുടെ രക്തത്തിലെ പഞ്ചസാരയെ പെട്ടെന്ന് വർധിപ്പിക്കുന്നു. ഇതിന് ശേഷം രക്തത്തിലെ പഞ്ചസാര വേ​ഗത്തിൽ കുറയുന്നു. രക്തത്തിലെ പഞ്ചസാര കുറയുമ്പോൾ, നിങ്ങളുടെ മാനസികാവസ്ഥയും ഉത്കണ്ഠയും വർധിക്കും.

കൃത്രിമ മധുരം ചേർത്ത മധുരപലഹാരങ്ങൾ കഴിക്കുന്നത് നമ്മുടെ ശരീരത്തിലെ വീക്കവും സമ്മർദ്ദവും വർദ്ധിപ്പിക്കും എന്ന് പഠനങ്ങൾ വ്യക്തമാക്കുന്നു. ഇത്തരം ഭക്ഷ്യവസ്തുക്കൾ അമിതമായി കഴിക്കുന്നത് വീക്കം, ഓക്സിഡേറ്റീവ് സമ്മർദ്ദം, അധിക ഫ്രീ റാഡിക്കലുകളുടെ ഉത്പാദനം എന്നിവയിലേക്ക് നയിച്ചേക്കാം.

അമിതമായ കഫീൻ ഉപയോ​ഗം ശരീരത്തെ അമിതമായി ഉത്തേജിപ്പിക്കുന്നതിലൂടെ നിങ്ങളുടെ അഡ്രീനൽ ഗ്രന്ഥികൾക്ക് പ്രശ്‌നമുണ്ടാക്കും. നാഡീവ്യവസ്ഥയെ ഉത്തേജിപ്പിക്കുന്നതിനാൽ, കഫീൻ രക്തസമ്മർദ്ദവും ഹൃദയമിടിപ്പും വർധിപ്പിക്കും, ഇത് ആത്യന്തികമായി ഉത്കണ്ഠയും സമ്മർദ്ദവും വർധിപ്പിക്കും.

വറുത്ത ഭക്ഷണത്തിൽ ഉയർന്ന അളവിൽ ട്രാൻസ് ഫാറ്റ് അടങ്ങിയിട്ടുണ്ട്. ‌ശരീരത്തിലെ വീക്കത്തിനുള്ള ഒരു പ്രധാന കാരണം ട്രാൻസ് ഫാറ്റ് ആണ്. ശരീരം വീക്കം എന്ന അവസ്ഥയിലൂടെ കടന്നുപോകുമ്പോൾ, നിങ്ങളുടെ സമ്മർദ്ദത്തിന്റെയും ഉത്കണ്ഠയുടെയും അവസ്ഥയും വളരെ മോശമാകാൻ സാധ്യതയുണ്ട്.