ഭർത്താവിന് ഇനിയും കുട്ടികൾ വേണം, പീഡനം സഹിക്കാവുന്നതിലും അപ്പുറം, പ്രായപൂർത്തിയാകാത്ത രണ്ട് പെൺമക്കളെ തൂക്കി കൊന്ന് അമ്മ ആത്മഹത്യ ചെയ്തു

ഭോപ്പാൽ: മധ്യപ്രദേശിലെ ഭോപ്പാലിൽ മക്കളെ കൊന്ന് സ്വയം ജീവനൊടുക്കി യുവതി. ചൊവ്വാഴ്ച രാത്രിയാണ് പ്രായപൂർത്തിയാകാത്ത രണ്ട് പെൺമക്കളെ തൂക്കി കൊന്നതിന് ശേഷം 28 കാരിയായ യുവതിയും ആത്മഹത്യ ചെയ്യുന്നത്.

മുന്നു കുട്ടികളുള്ള സംഗീതയുടെ ഒന്നര വയസ് പ്രായമുള്ള കുഞ്ഞ് മാത്രമാണ് ഇതിൽ നിന്ന് രക്ഷപെട്ടത്. ഭർത്താവിൻ്റെ ശാരീരികാതിക്രമമാണ് ഇതിന് പിന്നിലെന്ന് വ്യക്തമാക്കുന്ന കുറിപ്പും പോലീസിന് ലഭിച്ചിട്ടുണ്ട്. 

ആൺകുഞ്ഞിന് വേണ്ടിയുള്ള ഭർത്താവിൻ്റെ ആഗ്രഹമാണ് ഇവയ്ക്ക് പിന്നിലെന്നാണ് ആത്മഹത്യാ കുറിപ്പിൽ സംഗീത പറയുന്നത്. മറ്റൊരു കുട്ടിയെ ഗർഭംധരിക്കാനുള്ള ശാരീരികാവസ്ഥയിലല്ല താനെന്നും അവർ വ്യക്തമാക്കുന്നു. ആൺകുഞ്ഞിന് ജന്മം നൽകാത്തതിനാൽ ഭർത്താവ് രഞ്ജീത് യാദവ് തന്നെ ശാരീരികമായി പീഡിപ്പിച്ചിരുന്നതായും യുവതി കുറിപ്പിൽ പറയുന്നു. 

ആറ് വർഷം മുമ്പാണ് രഞ്ജീത് യാദവുമായുള്ള സംഗീതയുടെ വിവാഹം. മരിയ്ക്കുന്നതിന് മുൻപ്, സംഗീത തൻ്റെ സഹോദരി മോനയ്ക്കും സഹോദരൻ നീരജിനും അഞ്ച് കത്തുകളാണ് അയച്ചത്. മാനസികവും ശാരീരികവുമായ ബുദ്ധിമുട്ടുകൾ വിവരിക്കുന്നതായിരുന്നു കത്ത്. 

തൻ്റെ ഭാർതൃസഹോദരിക്ക് നൽകിയ ഒരു സന്ദേശത്തിൽ, അവൾ തൻ്റെ ഭർത്താവിൻ്റെ ആഗ്രഹം പ്രകടിപ്പിച്ചു, "നിങ്ങളുടെ സഹോദരൻ തനിക്ക് പെൺമക്കളുമായി ഒരു ബന്ധവുമില്ലെന്നും ഒരു ആൺകുട്ടിയെ വേണമെന്നും പറയുന്നു, 

അതിനാൽ ഞാൻ എൻ്റെ മൂന്ന് പെൺമക്കളെയും കൊന്നു, ഒപ്പം ഞാൻ സ്വയം കൊല്ലുകയാണ്." ആത്മഹത്യാ പ്രേരണയ്ക്ക് പോലീസ് കേസെടുത്ത് കൂടുതൽ അന്വേഷണം നടത്തിവരികയാണ്.