ബിജെപിയുടെ പാരഡി വീഡിയോയിൽ സ്ത്രീകളെ മോശമായി ചിത്രീകരിച്ചതിനെതിരെ പ്രതിപക്ഷം; സമൂഹത്തിൽ സ്ത്രീകളുടെ പങ്കിനെ കുറച്ചു കാണുന്നതാണ് പരസ്യമെന്ന് പ്രതിപക്ഷ നേതാക്കൾ

ഡല്‍ഹി: ഇന്ത്യാ മുന്നണി നേതാക്കളെ പരിഹസിക്കുന്ന ഏറ്റവും പുതിയ രാഷ്ട്രീയ പരസ്യത്തിനെതിരെ ബിജെപിക്കെതിരെ വിമർശനവുമായി പ്രതിപക്ഷം. സമൂഹത്തിൽ സ്ത്രീകളുടെ പങ്കിനെ കുറച്ചു കാണുന്നതാണ് പരസ്യമെന്ന് പ്രതിപക്ഷ നേതാക്കൾ പറഞ്ഞു.

രാഹുൽ ഗാന്ധി, ലാലു പ്രസാദ് യാദവ്, അരവിന്ദ് കേജ്‌രിവാൾ, ഉദ്ധവ് താക്കറെ എന്നിവരുൾപ്പെടെ പ്രതിപക്ഷ സഖ്യമായ ഇന്ത്യയുടെ വിവിധ നേതാക്കളെ അഭിനേതാക്കൾ പരിഹസിക്കുന്നത് പരസ്യത്തിൽ കാണിക്കുന്നുണ്ട്.

ഒരു സ്ത്രീയെ വധുവായി അണിയിച്ചൊരുക്കിയിരിക്കുന്നതും ഇന്ത്യാ ബ്ലോക്ക് നേതാക്കൾ അവരുടെ വരൻ ആരായിരിക്കുമെന്നതിനെച്ചൊല്ലി തർക്കിക്കുന്നതും കാണിക്കുന്നു. ഇത്  നേതൃത്വത്തെക്കുറിച്ചുള്ള പ്രതിപക്ഷത്തിൻ്റെ അനിശ്ചിതത്വത്തെ സൂചിപ്പിക്കുന്നു.

വിവാഹമെന്നത് പവിത്രമായ കാര്യമാണെന്നും പരസ്പര വിശ്വാസത്തിലും സ്‌നേഹത്തിലും അധിഷ്‌ഠിതമായ ബന്ധമാണിതെന്നും പരസ്യത്തോട് പ്രതികരിച്ച് കോൺഗ്രസ് വക്താവ് സുപ്രിയ ശ്രീനേറ്റ് പറഞ്ഞു. രക്തബന്ധത്തെക്കാൾ ശക്തമാണെന്നും ജീവിതത്തിലെ മറ്റെല്ലാ ബന്ധങ്ങളുടെയും അടിത്തറയാണിതെന്നും അവർ പറഞ്ഞു.

ബിജെപിയുടെ ഒരു അശ്ലീല പരസ്യം അവരുടെ യാഥാസ്ഥിതിക ദൃഷ്ടിയിൽ ഒരു സ്ത്രീയുടെ അസ്തിത്വം ലെഹംഗ ധരിക്കാനും വധുവാകാനും വരനെ ആകർഷിക്കാനും മാത്രമാണെന്ന് ഒരിക്കൽ കൂടി വ്യക്തമാക്കിയെന്നും അവർ കുറ്റപ്പെടുത്തി.

ഈ പരസ്യം ദൗർഭാഗ്യകരമാണെന്നും സമൂഹത്തിൽ സ്ത്രീയുടെ പങ്ക് കുറച്ചു കാണിക്കുന്നുവെന്നും  പ്രിയങ്ക ചതുർവേദി  പറഞ്ഞു. ഒരു സ്ത്രീയെ മുൻ നിർത്തി ബിസിനസ്സ് പങ്കാളികളുമായി വരുന്ന ഒരു വരനോട് സംസാരിക്കുന്നത്  ഈ രാജ്യത്ത് സ്ത്രീകളെ പരിഹസിക്കുന്നതായി ഞാൻ കരുതുന്നുവെന്നും അവർ പറഞ്ഞു.