കൊൽക്കത്ത വിമാനത്താവളത്തിൽ രണ്ട് വിമാനങ്ങളുടെ ചിറകുകൾ തമ്മിൽ കൂട്ടിയിടിച്ചു

കൊൽക്കത്ത: കൊൽക്കത്ത വിമാനത്താവളത്തിൽ ഇൻഡിഗോ വിമാനത്തിൻ്റെ ചിറകിൻ്റെ അഗ്രം എയർ ഇന്ത്യ എക്‌സ്പ്രസ് വിമാനത്തിൻ്റെ ചിറകിൽ തട്ടുകയായിരുന്നു. സംഭവത്തിൽ ഇരു വിമാനങ്ങളുടെയും ചിറകിൻ്റെ അറ്റം തകർന്നു. ഇൻഡിഗോ വിമാനം ദർഭംഗയിലേക്കും എയർ ഇന്ത്യ എക്സ്പ്രസ് വിമാനം ചെന്നൈയിലേക്കും പോകുകയായിരുന്നു.

രാവിലെ 11.10നായിരുന്നു സംഭവം. അപകടസമയത്ത് രണ്ട് വിമാനങ്ങളിലും യാത്രക്കാരുണ്ടായിരുന്നു. ആളപായമില്ല.എയർ ഇന്ത്യ എക്‌സ്‌പ്രസ് വിമാനത്തിൽ 163 യാത്രക്കാരും ആറ് ക്യാബിൻ ക്രൂവും ഉണ്ടായിരുന്നു. അതേസമയം, കൊൽക്കത്തയിൽ നിന്ന് ദർഭംഗയിലേക്കുള്ള ഇൻഡിഗോ 6E 6152 വിമാനത്തിൽ ആറ് ക്യാബിൻ ജീവനക്കാരും 149 യാത്രക്കാരും ഉണ്ടായിരുന്നു.

സംഭവത്തെക്കുറിച്ച് ഡയറക്ടറേറ്റ് ജനറൽ ഓഫ് സിവിൽ ഏവിയേഷനെ അറിയിച്ചു. വ്യോമയാന നിയന്ത്രണ സമിതി ഉന്നതതല അന്വേഷണം ആരംഭിച്ചിട്ടുണ്ട്. സംഭവത്തിൽ ഉൾപ്പെട്ട രണ്ട് ഇൻഡിഗോ പൈലറ്റുമാരെ ഡിജിസിഎ ഡീ റോസ്‌റ്റേഴ്‌സ് ചെയ്‌തതായി മുതിർന്ന ഡിജിസിഎ ഉദ്യോഗസ്ഥനെ ഉദ്ധരിച്ച് വാർത്താ ഏജൻസിയായ പിടിഐ റിപ്പോർട്ട് ചെയ്തു.

ചെന്നൈയിലേക്കുള്ള ഷെഡ്യൂൾ ചെയ്ത ഓപ്പറേഷനായി കൊൽക്കത്തയിലെ റൺവേയിൽ പ്രവേശിക്കാൻ അനുമതി കാത്ത് നിശ്ചലമായിരുന്ന ഞങ്ങളുടെ വിമാനങ്ങളിലൊന്നിനെ മറ്റൊരു വിമാനക്കമ്പനിയുടെ വിമാനത്തിൻ്റെ ചിറകിൻ്റെ അഗ്രം ഇടിക്കുകയായിരുന്നുവെന്ന് എയർ ഇന്ത്യ എക്‌സ്പ്രസ് പ്രസ്താവനയിൽ പറഞ്ഞു.

തുടർന്ന് വിമാനം ബേയിലേക്ക് മടങ്ങിയിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും എയർലൈൻ അറിയിച്ചു. അപകടത്തെക്കുറിച്ച് ഇൻഡിഗോയും പ്രസ്താവന ഇറക്കി.കൊൽക്കത്ത എയർപോർട്ടിൽ നിന്ന് ടാക്‌സി ചെയ്യുന്ന ഇൻഡിഗോ വിമാനത്തിനും മറ്റൊരു കാരിയറിനും ഇടയിൽ ഒരു ചെറിയ ഉരസൽ റിപ്പോർട്ട് ചെയ്യപ്പെട്ടു.

പ്രോട്ടോക്കോൾ പ്രകാരം വിമാനം പരിശോധനയ്‌ക്കും ആവശ്യമായ നടപടിക്കുമായി ബേയിലേക്ക് മടങ്ങി," ഇൻഡിഗോ പ്രസ്താവനയിൽ പറഞ്ഞു.