ജുഡീഷ്യറിയിൽ സമ്മർദംചെലുത്താൻ സ്ഥാപിതതാൽപര്യക്കാർ ശ്രമിക്കുന്നു; മുന്നറിയിപ്പുമായി ചീഫ് ജസ്റ്റിസിന് അഭിഭാഷകരുടെ കത്ത് ! കത്തില്‍ പറയുന്നത് ഇങ്ങനെ

ന്യൂഡല്‍ഹി: ജുഡീഷ്യറിയിൽ സമ്മർദ്ദം ചെലുത്താനും ജുഡീഷ്യൽ പ്രക്രിയയെ സ്വാധീനിക്കാനും കോടതികളെ അപകീർത്തിപ്പെടുത്താനും സ്ഥാപിതതാല്‍പര്യക്കാര്‍ ശ്രമിക്കുന്നെന്ന് ആരോപിച്ച് സുപ്രീം കോടതി ചീഫ് ജസ്റ്റിസ് ഡി.വൈ. ചന്ദ്രചൂഡിന് കത്തയച്ച് അഭിഭാഷകര്‍. അറുനൂറോളം അഭിഭാഷകരാണ് കത്തില്‍ ഒപ്പിട്ടിട്ടുള്ളത്.

 ചില കേസുകളിൽ കള്ളക്കഥ മെനഞ്ഞ് ജൂഡീഷ്യറിയെ സമ്മർദ്ദത്തിലാക്കാൻ ശ്രമം നടക്കുന്നുണ്ടെന്നും  അഭിഭാഷകര്‍ ആരോപിച്ചു. രാഷ്ട്രീയ കേസുകളിൽ അവരുടെ സമ്മർദ തന്ത്രങ്ങൾ വളരെ വ്യക്തമാണെന്നും കത്തില്‍ പറയുന്നു.

"ചില അഭിഭാഷകർ പകൽ സമയങ്ങളിൽ രാഷ്ട്രീയക്കാരെ സംരക്ഷിക്കുന്നതും രാത്രിയിൽ മാധ്യമങ്ങളിലൂടെ ജഡ്ജിമാരെ സ്വാധീനിക്കാൻ ശ്രമിക്കുന്നതും ആശങ്കാജനകമാണ്" എന്നാണ് കത്തിലെ ഒരു പരാമര്‍ശം. 

നിയമവാഴ്ചയില്ലാത്ത രാജ്യങ്ങളുമായി നമ്മുടെ കോടതികളെ താരതമ്യപ്പെടുത്തുകയും നമ്മുടെ ജുഡീഷ്യൽ സ്ഥാപനങ്ങളെ അന്യായമായ രീതികളിൽ കുറ്റപ്പെടുത്തുകയും ചെയ്യുന്ന തലത്തിലേക്ക് നിക്ഷിപ്ത താൽപ്പര്യ ഗ്രൂപ്പിലെ അംഗങ്ങൾ മാറിയെന്നും അഭിഭാഷകര്‍ പറയുന്നു.

നമ്മുടെ ജുഡീഷ്യറിയിലുള്ള പൊതുജനങ്ങളുടെ വിശ്വാസത്തെ നശിപ്പിക്കാനും നമ്മുടെ നിയമങ്ങളുടെ ന്യായമായ പ്രയോഗത്തെ ഭീഷണിപ്പെടുത്താനുമുള്ള നേരിട്ടുള്ള ആക്രമണങ്ങളാണ് ഇത്. വ്യക്തിപരവും രാഷ്ട്രീയവുമായ കാരണങ്ങളാൽ കോടതികളെ ഇകഴ്ത്താനും കൈകാര്യം ചെയ്യാനുമുള്ള ഈ ശ്രമങ്ങൾ ഒരു സാഹചര്യത്തിലും അനുവദിക്കാനാവില്ലെന്നും കത്തില്‍ അഭിഭാഷകര്‍ വ്യക്തമാക്കി.

നിശബ്ദത പാലിക്കുകയോ ഒന്നും ചെയ്യാതിരിക്കുകയോ ചെയ്യുന്നത് ദ്രോഹിക്കാൻ ഉദ്ദേശിക്കുന്നവർക്ക് കൂടുതൽ ശക്തി നൽകും. കുറച്ച് വർഷങ്ങളായി ഇത്തരം ശ്രമങ്ങൾ പതിവായി നടക്കുന്നതിനാൽ മാന്യമായ നിശബ്ദത പാലിക്കേണ്ട സമയമല്ല ഇത്. നിയമം ഉയർത്തിപ്പിടിക്കാൻ പ്രവർത്തിക്കുന്ന ആളുകൾ എന്ന നിലയിൽ, കോടതികൾക്ക് വേണ്ടി നിലകൊള്ളേണ്ട സമയമാണിതെന്ന് കരുതുന്നു.

കോടതികൾ നമ്മുടെ ജനാധിപത്യത്തിൻ്റെ നെടുംതൂണുകളായി ശക്തമായി നിലകൊള്ളുന്നുവെന്ന് ഉറപ്പാക്കിക്കൊണ്ട്, ഈ ആക്രമണങ്ങൾക്കെതിരെ നമ്മൾ ഒന്നിച്ച് ശബ്ദമുയർത്തേണ്ടതുണ്ടെന്നും അഭിഭാഷകര്‍ വ്യക്തമാക്കി.