തിരുവനന്തപുരം: നെയ്യാറ്റിന്കരയില് യുവാവിനെ വെട്ടിക്കൊലപ്പെടുത്തിയ സംഭവത്തില് പ്രതികളെത്തിയ കാറിന്റെ ഉടമയുടെ പിതാവിനെ തൂങ്ങി മരിച്ച നിലയില് കണ്ടെത്തി. ആത്മഹത്യയാണെന്നാണ് പ്രാഥമിക നിഗമനം.
അഞ്ചംഗ സംഘമെത്തിയ മാരുതി ആള്ട്ടോ കാറിന്റെ ഉടമ അച്ചുവിന്റെ പിതാവ് സുരേഷിനെയാണ് മരിച്ച നിലയില് കണ്ടെത്തിയത്. ഡ്രൈവറായ സുരേഷിനെ ഓലത്താന്നിയിലെ ജോലിസ്ഥലത്താണ് മരിച്ച നിലയില് കണ്ടെത്തിയത്. സംഭവത്തില് വാഹന ഉടമ അച്ചുവിന് പങ്കുണ്ടോയെന്ന് പോലീസ് പരിശോധിച്ചുവരികയാണ്. വ്യാഴാഴ്ച രാവിലെയാണ് സംഭവം. നെയ്യാറ്റിന്കരയ്ക്കു സമീപം കൊടങ്ങാവിളയില് ആദിത്യ(23)നെയാണ് വെട്ടിക്കൊന്നത്.
ബുധനാഴ്ച രാത്രി എട്ടിന് നെയ്യാറ്റിന്കരയ്ക്കു സമീപം കൊടങ്ങാവിളയില് കാറിലെത്തിയ അഞ്ചംഗ സംഘം യുവാവിനെ വെട്ടിക്കൊലപ്പെടുത്തുകയായിരുന്നു. നെല്ലിമൂട് സ്വദേശി ജിവിനുമായുള്ള പണമിടപാട് സംബന്ധിച്ച തര്ക്കമാണ് അക്രമത്തില് കലാശിച്ചത്. ബൈക്ക് പണയപ്പെടുത്തി ജിവിനില്നിന്ന് ആദിത്യന് പണം വാങ്ങിയിരുന്നു. പണയപ്പെടുത്തിയ ബൈക്കിന് ഇരുപതിനായിരം രൂപയാണ് നിശ്ചയിച്ചത്. ഇതില് പതിനായിരം രൂപ നല്കി. ബാക്കി പണത്തിനായി ആദിത്യന് എത്തിയപ്പോള് ജിവിന് ആദിത്യനെ ആക്രമിച്ചു.
ഈ സംഭവശേഷം, പണമിടപാടു സംബന്ധിച്ച കാര്യം പറഞ്ഞുതീര്ക്കാമെന്നു പറഞ്ഞ് ആദിത്യനെ സംഘം കൊടങ്ങാവിളയില് വിളിച്ചുവരുത്തി. തുടര്ന്നാണ് കാറിലുണ്ടായിരുന്നവര് വാളുപയോഗിച്ച് ആദിത്യനെ ആക്രമിച്ചത്. പിന്നീട്, അക്രമിസംഘം കാറുപേക്ഷിച്ചു കടന്നുകളയുകയായിരുന്നു.