ഉള്ള്യേരിയില്‍ ബോംബ് കണ്ടെത്തിയെന്ന്, പരിഭ്രാന്തി; പരിശോധനയില്‍ കണ്ടെത്തിയത് പ്രോട്ടീന്‍ പൗഡര്‍ ടിന്‍

കോഴിക്കോട്: ഉള്ള്യേരിയില്‍ ബോംബ് കണ്ടെത്തിയെന്ന വാര്‍ത്ത പരിഭ്രാന്തി പരത്തി. ഇന്ന് രാവിലെ ഏഴിനാണ് ടൗണിലെ ഹോട്ടലിനു സമീപത്തായി ബോംബ് കണ്ടെത്തിയെന്ന വാര്‍ത്ത പരന്നത്.

തെങ്ങുകയറ്റ തൊഴിലാളിയാണ് ഉപേക്ഷിച്ച നിലയില്‍ ബോംബെന്നു സംശയിക്കുന്ന തരത്തിലുള്ള ടിന്നുകള്‍ കണ്ടെത്തിയത്. വിവരം നാട്ടുകാര്‍ അത്തോളി പോലീസിനെ അറിയിച്ചു. പോലീസ് എത്തി പരിശോധന നടത്തിയശേഷം പയ്യോളി ബോംബ് സ്‌ക്വാഡിനെയും ബാലുശ്ശേരി ഡോഗ് സ്‌ക്വാഡിനെയും വിവരം അറിയിക്കുകയായിരുന്നു. 

ഇവര്‍ സ്ഥലത്തെത്തി പരിശോധന നടത്തി. കണ്ടെടുത്ത ടിന്നുകള്‍ ബോംബ് സ്‌ക്വാഡ് എക്‌സ്‌പ്ലോസീവ് റിങ്ങിലേക്കിറക്കി വച്ച് പരിശോധന നടത്തി. തുടര്‍ന്ന് ഇതു ബോംബല്ലെന്നും അടുത്തുള്ള ജിമ്മില്‍നിന്നു ഉപേക്ഷിച്ച പ്രോട്ടീന്‍ പൗഡറുകളുടെ ടിന്നാണെന്നും ഇവര്‍ സ്ഥിരീകരിക്കുകയായിരുന്നു.