രാജ്യത്തെ സാമ്പത്തിക തകർച്ചയും അക്രമ സംഭവങ്ങളും ആശങ്കാജനകം: അനിൽ അക്കരെ എം എൽ എ

ഷാർജ:  ഹൃസ്വ സന്ദർശത്തിനായി ആദ്യമായി യു എ യി ലെത്തിയ അനിൽ അക്കരെ എം എൽ എ ക്കു യു എ ഇയിലെ ഇൻകാസ് പ്രവർത്തകർ ചേർന്ന് സ്വീകരണം നൽകി.

കേന്ദ്ര സംസ്ഥാന സർക്കാരുകളുടെ തെറ്റായ നയങ്ങൾ രാജ്യത്തെ പട്ടിണിയിലേക്ക് നയിക്കുമെന്നും വർധിച്ചു വരുന്ന അക്രമങ്ങളും സാമ്പത്തിക തകർച്ചയും സാമൂഹിക അസമത്വവും രാജ്യത്തെ അരാജകത്വത്തിലേക്ക് വഴി തെളിയിക്കുമെന്നും അദ്ദേഹം പറഞ്ഞു.

സമാധാനവും സംതൃപ്തിയും സുരക്ഷയും സാമ്പത്തിക വളർച്ചയുമുണ്ടായിരുന്ന കോൺഗ്രസ്സ് ഭരണകാലം ഇന്നത്തെ ഭരണവുമായി താരതമ്യം ചെയ്യാനുള്ള അവസരമാണിത്‌ . അധികാരമുപയോഗിച്ചു ഭയപ്പെടുത്തി പ്രതികരിക്കുന്നവരെ നിശ്ശബ്ദരാക്കാനുള്ള ശ്രമങ്ങളാണ് നടക്കുന്നത് .

കോൺഗ്രസ്സിന്റെ തിരിച്ചു വരവാണ് ഭാരതജനത ആഗ്രഹിക്കുന്നത്. ഘടകകക്ഷികൾ പോലും ബി ജെ പി യെ കൈവിടുകയാണ് - അദ്ദേഹം തുടർന്ന് പറഞ്ഞു.

ഇൻകാസ് കേന്ദ്രകമ്മിറ്റി വൈസ് പ്രസിഡന്റ് എൻ പി രാമചന്ദ്രൻ, സെക്രട്ടറി ചന്ദ്രപ്രകാശ് ഇടമന, വൈസ് പ്രസിഡന്റ് സതീഷ് കുമാർ , ഇൻകാസ് ഫുജൈറ പ്രസിഡന്റ് കെ സി അബൂബക്കർ , ഗ്ലോബൽ കമ്മിറ്റി അംഗങ്ങളായ സുഭാഷ് ചന്ദ്രബോസ് , ഷാജി പെരുമ്പിലാവ്, നാസർ പാണ്ടിക്കാട്, യൂസുഫലി തുടങ്ങിയവർ നേതൃത്വം നൽകി.