റിയൽ‌മി X50 പ്രോ 5ജി സ്മാർട്ട്ഫോണിന്റെ വിൽപ്പന ഇന്ന്

റിയൽ‌മി X50 പ്രോ 5ജി സ്മാർട്ട്ഫോണിന്റെ വിൽപ്പന ഇന്ന് ഉച്ചയ്ക്ക് നടക്കും. ഫെബ്രുവരിയിൽ രാജ്യത്ത് അവതരിപ്പിച്ച ഈ ഡിവൈസിന്റെ അവസാനത്തെ ഫ്ലാഷ് സെയിൽ നടന്നത് മാർച്ചിലാണ്. റിയൽ‌മി എക്സ് 50 പ്രോ 5ജിയുടെ ഫ്ലാഷ് സെയിൽ നാല് മാസത്തെ ഇടവേളയ്ക്ക് ശേഷം പുനരാരംഭിച്ചപ്പോൾ വിലയും വർധിച്ചിട്ടുണ്ട്. ഏപ്രിലിൽ ജിഎസ്ടി നിരക്ക് 12 ശതമാനത്തിൽ നിന്ന് 18 ശതമാനമായി ഉയർത്തിയതിനാലാണ് ഈ ഡിവൈസിന് വില വർധിപ്പിച്ചത്.

റിയൽ‌മി X50 പ്രോ 5 ജി സ്മാർട്ട്ഫോണിന്റെ വില ആരംഭിക്കുന്നത് 39,999 രൂപ മുതലാണ്. ഡിവൈസിന്റെ 6 ജിബി + 128 ജിബി സ്റ്റോറേജ് ഓപ്ഷനാണ് ഈ വില. 8 ജിബി + 128 ജിബി സ്റ്റോറേജ് ഓപ്ഷന് 41,999 രൂപയും 12 ജിബി + 256 ജിബി സ്റ്റോറേജ് ഓപ്ഷന് 47,999 രൂപയും വിലയുണ്ട്. ഡിവൈസ് ഇന്ന് ഉച്ചയ്ക്ക് 12 മണിക്ക് ഫ്ലിപ്പ്കാർട്ട്, റിയൽമി.കോം എന്നിവ വഴി ലഭ്യമാകും. മോസ് ഗ്രീൻ, റസ്റ്റ് റെഡ് എന്നീ രണ്ട് കളർ ഓപ്ഷനുകളിൽ ഡിവൈസ് ലഭ്യമാണ്.

റിയൽ‌മി X50 പ്രോ സ്മാർട്ട്ഫോണിന് കഴിഞ്ഞ ദിവസം 3,000 രൂപ വരെ വർധിപ്പിച്ചിരുന്നു. നേരത്തെ 6 ജിബി + 128 ജിബി വേരിയന്റ് 37,999 രൂപയ്ക്കാണ് വിൽപ്പന നടത്തിയിരുന്നത്. ഡിവൈസിന്റെ 8 ജിബി + 128 ജിബി കോൺഫിഗറേഷന് 39,999 രൂപയായിരുന്നു വില. ടോപ്പ്-എൻഡ് മോഡലായ 12 ജിബി + 256 ജിബി വേരിയന്റ് നേരത്തെ 44,999 രൂപയ്ക്ക് ലഭ്യമായിരുന്നു.