പനാജി: കാറപകടത്തില് പരിക്കേറ്റ് ഗോവ മെഡിക്കല് കോളജില് ചികിത്സയില് കഴിയുന്ന കേന്ദ്ര ആയുഷ് മന്ത്രി ശ്രീപദ് വൈ. നായിക്കിന്റെ ആരോഗ്യനില മെച്ചപ്പെട്ടുവെന്ന് ഡോക്ടര്മാര് അറിയിച്ചു. ചികിത്സയോട് അദ്ദേഹം പ്രതികരിക്കുന്നുണ്ടെന്നും ആശുപത്രി അധികൃതര് വ്യക്തമാക്കി.
എയിംസിലെ ഡോ.എസ്. രാജേശ്വരിയുടെ നേതൃത്വത്തിലുള്ള സംഘമാണ് മന്ത്രിയെ നിരീക്ഷിക്കുന്നത്. ഉത്തര കന്നഡയിലെ അങ്കോലയില് തിങ്കളാഴ്ച രാത്രിയുണ്ടായ അപകടത്തില് ശ്രീപദിന്റെ ഭാര്യയും പ്രൈവറ്റ് സെക്രട്ടറിയും മരിച്ചിരുന്നു. കര്ണാടകയിലെ ധര്മസ്ഥലയില്നിന്നു ഗോവയിലേക്കു കാറില് മടങ്ങുകയായിരുന്നു ഇവര്. മന്ത്രിയുടെ ആരോഗ്യനില വീണ്ടെടുക്കാന് നാലുമാസമെങ്കിലും വേണ്ടിവരുമെന്ന് ഡോക്ടര്മാര് പറഞ്ഞു.