അരൂരില്‍ ഷാനിമോള്‍,​ കോന്നിയില്‍ മോഹന്‍രാജ്:​ യു.ഡി.എഫ് അന്തിമ പട്ടിക ഹൈക്കമാന്റിന് അയച്ചു

തിരുവനന്തപുരം: അരൂരില്‍ ഷാനിമോള്‍ ഉസ്മാന്‍ യു.ഡി.എഫ് സ്ഥാനാര്‍ത്ഥിയാകും. ഇത് സംബന്ധിച്ച്‌ അന്തിമ പട്ടിക ഹൈക്കമാന്റിന് അയച്ചു. മറ്റ് സ്ഥലങ്ങളിലെ കോണ്‍ഗ്രസ് സ്ഥാനാര്‍ത്ഥിയെ നേരത്തെ പ്രഖ്യാപിച്ചിരുന്നു.

എറണാകുളത്ത് ടി.ജെ വിനോദും കോന്നിയില്‍ മോഹന്‍രാജും വട്ടിയൂര്‍കാവില്‍ കെ മോഹന്‍കുമാറും മത്സരിക്കും. നേരത്തെ കോന്നി സീറ്റ് ഐ ഗ്രൂപ്പില്‍ നിന്ന് എ ഗ്രൂപ്പ് ഏറ്റെടുത്തിരുന്നു. ഇതോടെ അരൂര്‍ സീറ്റ് എറ്റെടുക്കാന്‍ ഐ ഗ്രൂപ്പ് നിര്‍ബന്ധിതരായി. സ്ഥാനാര്‍ത്ഥികളെ സംബന്ധിച്ചുള്ള ഔദ്യോഗിക പ്രഖ്യാപനം നാളെ നടത്തും.

അരൂരില്‍ ഈഴവ സ്ഥാനാര്‍ത്ഥി വേണമെന്ന് ആവശ്യമുയര്‍ന്നിരുന്നു. എം ലിജുവിനെ മത്സരിപ്പിക്കാന്‍ തീരുമാനം ഉണ്ടായിരുന്നെങ്കിലും അദ്ദേഹത്തിന് താല്‍പ്പര്യമില്ലെന്ന് അറിയിക്കുകയായിരുന്നു.