കോണ്‍ഗ്രസിനെതിരെ പൊട്ടിത്തെറിച്ച് കര്‍ണാടക മുഖ്യമന്ത്രി എച്ച് ഡി കുമാരസ്വാമി....മാണ്ഡ്യ മണ്ഡലത്തില്‍ സഖ്യത്തിന്റെ സ്ഥാനാര്‍ത്ഥിയും തന്റെ മകനുമായ നിഖിലിനെ തോല്‍പ്പിക്കാന്‍ കോണ്‍ഗ്രസ് ചക്രവ്യൂഹം തീര്‍ത്തു...കോണ്‍ഗ്രസ് പ്രവര്‍ത്തിക്കുന്നത് സുമലതയ്ക്ക് വേണ്ടിയാണെന്നും നിഖിലിന് വേണ്ടിയല്ലെന്നും കുമാരസ്വാമി

ബംഗളൂരു: സഖ്യ കക്ഷിയായ കോണ്‍ഗ്രസിനെതിരെ പൊട്ടിത്തെറിച്ച് കര്‍ണാടക മുഖ്യമന്ത്രി എച്ച് ഡി കുമാരസ്വാമി.

മാണ്ഡ്യ മണ്ഡലത്തില്‍ സഖ്യത്തിന്റെ സ്ഥാനാര്‍ത്ഥിയും തന്റെ മകനുമായ നിഖിലിനെ തോല്‍പ്പിക്കാന്‍ കോണ്‍ഗ്രസ് ചക്രവ്യൂഹം തീര്‍ക്കുകയാണെന്ന് കുമാരസ്വാമി തുറന്നടിച്ചു.

മാണ്ഡ്യയില്‍ കോണ്‍ഗ്രസ് നേതാവും നടനുമായിരുന്ന അംബരീഷിന്റെ ഭാര്യയും പ്രമുഖ നടിയുമായ സുമലത സ്വതന്ത്ര സ്ഥാനാര്‍ത്ഥിയായി മത്സരിക്കുന്നുണ്ട്.

ഇവിടെ കോണ്‍ഗ്രസ് പ്രവര്‍ത്തിക്കുന്നത് സുമലതയ്ക്ക് വേണ്ടിയാണെന്നും സഖ്യ സ്ഥാനാര്‍ത്ഥിയായ നിഖിലിന് വേണ്ടിയല്ലെന്നുമാണ് കുമാരസ്വാമിയുടെ ആരോപണം.

മാണ്ഡ്യയിലെ സ്വതന്ത്ര സ്ഥാനാര്‍ത്ഥിക്ക് വലിയ പിന്തുണയാണ് ലഭിക്കുന്നത്. അവര്‍ സ്വതന്ത്ര സ്ഥാനാര്‍ത്ഥിയാണെങ്കില്‍ പോലും കോണ്‍ഗ്രസ്, ബിജെപി, കര്‍ഷക അസോസിയേഷനായ റെയ്ത സംഘ എന്നിവരുടെ പിന്തുണ ലഭിക്കുന്നുണ്ട്. ജെഡിഎസിനെ തോല്‍പ്പിക്കാനായി ഇവര്‍ കൈകോര്‍ത്തിരിക്കുകയാണെന്നും കുമാരസ്വാമി പറഞ്ഞു.