വഴിത്തർക്കം: ചേർത്തലയിൽ ഗൃഹനാഥൻ കൊല്ലപ്പെട്ടു

ആലപ്പുഴ: വഴിത്തർക്കത്തെ തുടർന്നുണ്ടായ സംഘട്ടനത്തിൽ ഗൃഹനാഥൻ കൊല്ലപ്പെട്ടു. ആലപ്പുഴ ചേർത്തലയിലാണ് സംഭവം. ആലുങ്കൽ മറ്റത്തിൽ വീട്ടിൽ മണിയൻ (78)ആണ് മരിച്ചത്. സംഭവത്തിൽ അയൽവാസികളായ സുന്ദരേശ്വര റാവു, ശ്രീധര റാവു എന്നിവർ അറസ്റ്റിലായി.

ഇന്ന് ഉച്ചയോടെയാണ് സംഭവം നടന്നത്. കഴിഞ്ഞ കുറച്ചു നാളുകളുമായി മണിയനും മറ്റ് രണ്ട് പേരുമായി വഴിത്തർക്കമുണ്ടായിരുന്നു. ബൈക്കിൽ വരികയായിരുന്ന സുന്ദരേശ്വര റാവുവിനേയും ശ്രീധര റാവുവിനേയും മണിയൻ വഴിയിൽ തടഞ്ഞു. ഇതേ തുടർന്നുണ്ടായ സംഘട്ടനത്തിനിടെ മണിയനെ സുന്ദരേശ്വര റാവുവും ശ്രീധര റാവുവും ചേർന്ന് മർദിക്കുകയും പിടിച്ച് തള്ളുകയുമായിരുന്നു.

തലയിടിച്ച് വീണ മണിയനെ ആശുപത്രിയിലേക്ക് കൊണ്ടുപോകും വഴിയാണ് മരണം സംഭവിച്ചത്. പൊലീസ് കേസെടുത്തു. മണിയന്റെ മൃതദേഹം പോസ്റ്റുമോർട്ടത്തിനായി ആശുപത്രിയിലേക്ക് മാറ്റി.