അമ്പലപ്പുഴ: യുവാവിനെ വെട്ടിപ്പരിക്കേല്പിച്ച് കുറ്റിക്കാട്ടില് തള്ളിയനിലയില് കണ്ടെത്തി. ആലപ്പുഴ ഇരവുകാട് വാര്ഡില് കഞ്ഞിക്കാരന് വളപ്പ് വീട്ടില് സഞ്ജുവിനെയാണ് (23) പുന്നപ്ര മാര്ക്കറ്റ് ബീച്ച് റോഡില് വിയാനി പള്ളിക്ക് സമീപത്തെ കുറ്റിക്കാട്ടില് കണ്ടെത്തിയത്.
ഞായറാഴ്ച രാത്രിയിലായിരുന്നു സംഭവം. റെയില്വേ ട്രാക്കിന് സമീപത്തെ കുറ്റിക്കാട്ടില്നിന്നുള്ള നിലവിളി കേട്ട് പ്രദേശവാസികള് നടത്തിയ തിരച്ചിലിലാണ് വെട്ടേറ്റ് ചോരയില് കുളിച്ചനിലയില് ഇയാളെ കണ്ടെത്തിയത്.
രണ്ട് പാദവും വെട്ടിപ്പരിക്കേല്പിച്ച നിലയില് കണ്ടെത്തിയ ഇയാളെ വിവരമറിഞ്ഞെത്തിയ പുന്നപ്ര പൊലീസ് ആലപ്പുഴ മെഡിക്കല് കോളജ് ആശുപത്രിയിലും പിന്നീട് കോട്ടയം മെഡിക്കല് കോളജ് ആശുപത്രിയിലേക്കും മാറ്റി.
കുതിരപ്പന്തിയില് കഴിഞ്ഞദിവസം ഉണ്ടായ സംഘര്ഷത്തിന് ശേഷം പുന്നപ്രയില് ഒളിവില് താമസിച്ചുവരുകയായിരുന്നു ഇയാളെന്ന് പൊലീസ് സംശയിക്കുന്നു.