ഒരു ചെറുദ്വീപ് വിൽപ്പനയ്ക്ക് ! നീലക്കടലിനു നടുവിൽ പച്ചപ്പുനിറഞ്ഞ അതിമനോഹരമായ ദ്വീപ് 

ശാന്തമായ് നിലകൊള്ളുന്ന ബൂട്ട് മലനിരകൾക്കു താഴെയുള്ള നീലക്കടലിനു നടുവിൽ പച്ചപ്പൊട്ട് പോലെ ദൃശ്യസുന്ദരമായൊരു തുരുത്ത്. അത് കൂടുതൽ വശ്യമനോഹരമാകണമെങ്കിൽ ബൂട്ട് മലമുകളിൽനിന്നു തന്നെ കാണണം. Inchmarnock എന്നാണ് അതിന്റെ പേര്‌.

സ്കോട്ട്ലാൻഡിലെ ആളില്ലാത്ത ആ ദ്വീപ് വിൽക്കാനുണ്ട്. 660 ഏക്കർ സ്ഥലമുള്ള 2.66 ചതുരശ്ര കിലോമീറ്റർ വിസ്തൃതിയും 7.5 കിലോമീറ്റർ നീളമുള്ള കടൽത്തീരവുമടങ്ങിയ പച്ചപ്പുനിറഞ്ഞ അതിമനോഹരമായ Inchmarnock എന്ന ദ്വീപ് അതിന്റെ ഇപ്പോഴത്തെ ഉടമസ്ഥർ വിൽക്കുകയാണ്. വില നിശ്ചയിച്ചിരിക്കുന്നത് 1.4 പൗണ്ട് (12 കോടി രൂപ) ആണ്.

ഈ ദ്വീപിൽ ഇപ്പോൾ ആൾതാമസമില്ല. ഇവിടുത്തെ ജനസംഖ്യ 41 ആയിരുന്നു. അവസാനത്തെ വ്യക്തിയും ഈ ദ്വീപ് വിടുന്നത് 1986 ലാണ്. 1999 ൽ ഇതിന്റെ ഇപ്പോഴത്തെ ഉടമസ്ഥരായ ദമ്പതികൾ ഇവിടം ഒരു ഹോളിഡേ ആസ്ഥാനമായി ഉപയോഗിച്ചുവരുകയായിരുന്നു. അതിനായി 4 ബെഡ് റൂമുകളുള്ള ഒരു ഹോളിഡേ ഹോമും നിർമ്മിച്ചിട്ടുണ്ട്.

ഇപ്പോഴവർ ഈ ദ്വീപ് വിൽക്കാൻ തീരുമാനിച്ചിരിക്കുന്നു. ഇതിനായി അവർ Strutt & Parker എന്ന എസ്റ്റേറ്റ് ഏജൻസിയെ ആണ് ചുമതലപ്പെടുത്തിയിരിക്കുന്നത്. അവരുടെ അഭിപ്രായത്തിൽ ഈ ദ്വീപ് കൃഷിക്ക് വളരെ അനുയോജ്യമാണ്. ദ്വീപിലേക്ക്‌ വരാനും പോകാനും ഒരു കടത്തും ബോട്ടുമുണ്ട്. വൈദ്യുതിക്ക് സോളാർ സിസ്റ്റം സ്ഥാപിക്കാവുന്നതാണ്. നല്ലൊരു സ്റ്റേഡിയം ഇവിടെ നിർമ്മിക്കാവുന്നതാണ് കൂടാതെ മൽസ്യബന്ധന ബിസിനസിന് ഈ ദ്വീപിൽ അനന്തമായ സാദ്ധ്യതകളാണുള്ളത്.

സ്കോട്ട്ലാൻഡുകാർ മാത്രമല്ല വിദേശീയർക്കും ഈ ദ്വീപ് വാങ്ങാവുന്നതാണ്.