മലപ്പുറത്ത് മരിച്ച 11 മാസം പ്രായമുള്ള കുഞ്ഞിന് കൊവിഡ് സ്ഥിരീകരിച്ചു; കുടുംബാംഗങ്ങളില്‍ ആറു പേര്‍ക്കും കൊവിഡ്‌

മലപ്പുറം: 11മാസം പ്രായമുള്ള കുഞ്ഞ് കോഴിക്കോട് മെഡിക്കല്‍ കോളജ് ആശുപത്രിയില്‍ കൊവിഡ് ബാധിച്ചു മരിച്ചു. മാതാവിന്റെ വീട്ടിലേക്കു കുടുംബത്തോടൊപ്പം വിരുന്നിനെത്തിയ കുഞ്ഞാണ് കോവിഡ് ബാധിച്ചു മരിച്ചത്. മലപ്പുറം കൊണ്ടോട്ടി പുളിക്കല്‍ അരൂരില്‍ വിരുന്നിനെത്തിയ താനൂര്‍ ഓമച്ചപ്പുഴ കാടിയങ്ങല്‍ റമീസിന്റെ മകള്‍ ആസ്യ അമാന (11 മാസം)യാണ് മരിച്ചത്.

മരിച്ച കുഞ്ഞിനു കൊവിഡ് സ്ഥിരീകരിച്ചതോടെ വീട്ടിലെ മറ്റുള്ളവരില്‍ നടത്തിയ പരിശോധനയില്‍ ആറു പേരും കൊവിഡ് പോസിറ്റീവാണെന്ന് കണ്ടെത്തി. ഇവരെ മഞ്ചേരി മെഡിക്കല്‍ കോളേജിലേക്കു മാറ്റി.

മാതാവ് ലുലു തസ്രീഫയുടെ അരൂരിലെ വീട്ടില്‍ വിവാഹ ചടങ്ങുമായി ബന്ധപ്പെട്ട സല്‍ക്കാരത്തിനെത്തിയതായിരുന്നു കുടുംബം. പിതാവ് റമീസ് വിദേശത്താണ്. പെരുന്നാള്‍ കഴിഞ്ഞ് താനൂരിലേക്കു മടങ്ങാനുളള തീരുമാനത്തിലായിരുന്നു കുടുംബം.

വെള്ളിയാഴ്ച ഉച്ചയോടെയാണ് കുഞ്ഞിനു പനിയോടു കൂടിയ ശാരീരികാസ്വസ്ഥ്യമുണ്ടായത്. തുടര്‍ന്നു പുളിക്കല്‍ സ്വകാര്യ ആശുപത്രിയിലും തുടര്‍ന്നു കോഴിക്കോട് മെഡിക്കല്‍ കോളേജ് ആശുപത്രിയിലും പ്രവേശിപ്പിച്ചെങ്കിലും രാത്രിയോടെ മരിച്ചു. മരിച്ച കുഞ്ഞും കുടുംബവും വിദേശത്തായിരുന്നു. പിന്നീട് കൊവിഡ് വ്യാപനം വന്നതോടെ നാട്ടിലേക്ക് മടങ്ങിയതായിരുന്നു. ആയിഷ ഏക സഹോദരിയാണ്.