ജനീവ: കോവിഡ് 19ന്റെ ഉറവിടം ചൈനയിലെ സര്ക്കാര് വൈറോളജി ലബോറട്ടറിയാണെന്നതിന് ശാസ്ത്രീയ തെളിവുകളില്ലെന്ന് ലോകാരോഗ്യ സംഘടന. ഡബ്ല്യൂ.എച്ച്.ഒ എമര്ജന്സി ഡയറക്ടര് മൈക്കില് റിയാനാണ് ഇക്കാര്യം വ്യക്തമാക്കിയത്.
വൂഹാനിലെ ലാബില് നിന്നാണ് വൈറസ് പകര്ന്നതെന്ന അമേരിക്കയുടെ വാദം സാധൂകരിക്കുന്ന രേഖകളോ തെളിവുകളോ കൈവശമില്ലെന്നും മൈക്കില് റിയാന് പറഞ്ഞു.
കോവിഡിന്റെ ഉറവിടം വുഹാനിലെ ലാബാണെന്ന് യു.എസ് പ്രസിഡന്റ് ഡോണാള്ഡ് ട്രംപും യു.എസ് സ്റ്റേറ്റ് സെക്രട്ടറി മൈക്ക് പോംപിയോയും കഴിഞ്ഞ ദിവസം ആരോപിച്ചിരുന്നു. ഇതിനുള്ള തെളിവുകള് തങ്ങളുടെ കൈവശമുണ്ട്. സുപ്രധാന വിവരങ്ങള് മറച്ചുവെച്ച ചൈനക്കാണ് വൈറസ് വ്യാപനത്തില് ഉത്തരവാദിത്വമെന്നും ട്രംപ് പറഞ്ഞിരുന്നു.