ബന്ധു വീട്ടില്‍ വിരുന്നു വന്ന പെണ്‍കുട്ടി പുഴയില്‍ മുങ്ങി മരിച്ചു

കോഴിക്കോട്: ബന്ധുവീട്ടില്‍ വിരുന്നിനെത്തിയ പെണ്‍കുട്ടി പുഴയില്‍ മുങ്ങി മരിച്ചു. മടവൂര്‍ അടുക്കത്ത്പറമ്പത്ത് ഹാരിസ്-ഫസ്‌ന ദമ്പതിമാരുടെ മകള്‍ ഹന ഫാത്തിമ (7)യാണ് മരിച്ചത്. രണ്ടാംക്ലാസ് വിദ്യാര്‍ത്ഥിനിയാണ് ഹന.

ഹന ഫാത്തിമയ്‌ക്കൊപ്പം ഒഴുക്കില്‍പെട്ട വട്ടത്ത് മണ്ണില്‍ ഷമീറിന്റെ മകള്‍ ഫാത്തിമ സഹമത്ത് (8) കോഴിക്കോട്ടെ സ്വകാര്യ ആശുപത്രിയില്‍ തീവ്രപരിചരണവിഭാഗത്തില്‍ ചികിത്സയിലാണ്.

മാതൃസഹോദരനായ ഷമീറിന്റെ വീട്ടില്‍ വിരുന്നിനെത്തിയതായിരുന്നു ഹന ഫാത്തിമ. വല്ല്യുമ്മയ്‌ക്കൊപ്പം പുഴയില്‍ കുളിക്കുന്നതിനിടെ ഹനയും സഹമത്തും ഒഴുക്കില്‍പെടുകയായിരുന്നു. ചാലക്കര അവേലം കടവില്‍ തിങ്കളാഴ്ച ഉച്ചയ്ക്ക് ഒന്നരയോടെയാണ് അപകടം.