കൊച്ചി: പാറ്റൂര് കേസില് ജേക്കബ് തോമസിന് ഹൈക്കോടതിയുടെ രൂക്ഷവിമര്ശനം. ഊഹാപോഹങ്ങള് ആണ് വസ്തുതകള് ആയി അവതരിപ്പിക്കുന്നതെന്ന് കോടതി വിമര്ശിച്ചു. റിപ്പോര്ട്ട് വായിച്ചാല് മറ്റെല്ലാവരും അഴിമതിക്കാരാണെന്നാണ് തോന്നുക. ത്വരിത പരിശോധനാ റിപ്പോര്ട്ടിന്റെ ഫയല് അടുത്ത ബുധനാഴ്ച ഹാജരാക്കണം.
പാറ്റൂര് ഭൂമിയിടപാട് കേസ് റദ്ദാക്കണമെന്നാവശ്യപ്പെട്ട് മുന് ചീഫ് സെക്രട്ടറി ഭരത് ഭൂഷണ് സമര്പ്പിച്ച ഹര്ജിയാണ് ഹൈകോടതി ഇന്ന് പരിഗണിച്ചത്. പാറ്റൂര് കേസിലെ ഭൂമി പതിവ് രേഖകള് അപൂര്ണ്ണമാണെന്ന് വിജിലന്സ് ഡയറക്ടര് ആയിരിക്കെ ജേക്കബ് തോമസ് ലോകായുക്തയില് റിപ്പോര്ട്ട് നല്കിയിരുന്നു. ഇതിന്മേല് ഹൈകോടതി ജേക്കബ് തോമസിനെ വിളിച്ചു വരുത്തി വിശദീകരണം തേടിയിരുന്നു. രേഖാമൂലം വിശദീകരണം നല്കാന് ആവശ്യപ്പെടുകയും ചെയ്തു. എന്നാല് വിശദീകരണം വൈകിയ സാഹചര്യത്തില് ഹൈക്കോടതി ഇടക്കാല ഉത്തരവിലൂടെ ജേക്കബ് തോമസിനെതിരെ വിമര്ശനം ഉന്നയിച്ചു. പാറ്റൂര് കേസിലെ ഭൂമി പതിവ് രേഖകള് പൂര്ണ്ണമാണ് എന്നും ഹൈക്കോടതി നിരീക്ഷിച്ചിരുന്നു.
തിരുവനന്തപുരത്ത് പാറ്റൂരില് വാട്ടര് അതോറിറ്റിയുടെ സ്വീവേജ് പൈപ്പ് ലൈന് മാറ്റി സ്ഥാപിച്ച് സ്വകാര്യ ബില്ഡര്ക്ക് 12.75 സെന്റ് ഭൂമി ലഭ്യമാക്കിയെന്നാണ് മുന് മുഖ്യമന്ത്രി ഉമ്മന് ചാണ്ടി, മുന് ചീഫ് സെക്രട്ടറി ഇ കെ ഭരത് ഭൂഷന് തുടങ്ങിയവര് ഉള്പ്പെട്ട കേസിലെ ആരോപണം.